12 žniŭnia Mikoła Statkievič sustreŭ u turmie 57 dzień narodzinaŭ.
Jak paviedamiła Svabodzie jahonaja žonka Maryna Adamovič, administracyja Mahiloŭskaj turmy nie pieradaje jaje mužu šmatlikija paštoŭki z voli.
«Na siońniašni dzień jon atrymaŭ niekalki vinšavalnych listoŭ ad rodnych i dźvie paštoŭki nie ad svajakoŭ. Administracyja sprabuje stvaryć u jaho ŭražańnie, što jaho ŭsie pakinuli. Choć tolki praz sajt, jaki byŭ stvorany eŭradeputatam Marekam Mihalskim, jašče 10 dzion tamu było dasłana kala 900 listoŭ».
Pavodle Maryny Adamovič, u turmie pačałasia novaja chvala cisku na Statkieviča: «Nie paśpieli ź jaho źniać status złosnaha parušalnika, jamu tut ža vynieśli čarhovaje spahnańnie. Da taho ž mnie stali viadomyja šmatlikija śviežyja fakty nieakazańnia jamu medyčnaj dapamohi. Bolš za toje, mianie turbuje nia tolki nieakazańnie medyčnaj dapamohi, ale i nieabchodnaść hetaj dapamohi dla vielmi zdarovaha, vielmi treniravanaha čałavieka. Z adnaho boku, administracyja vyjaŭlaje pilnuju ŭvahu da jaho zdaroŭja, a z druhoha — adsutnaść reakcyi na znojdzienyja prablemy».
Heta ŭžo treci dzień naradžeńnia, jaki apazycyjny palityk adznačaje za kratami. Mikałaj Statkievič — adziny kandydat u prezydenty na vybarach 2010 hodu, jaki dahetul zastajecca ŭ źniavoleńni.
Mikałaj Statkievič naradziŭsia ŭ vioscy Ladna Słuckaha rajonu, pavodle adukacyi inžyner-vajskoviec, kandydat techničnych navuk. Palityk sacyjał-demakratyčnaha kryła. Byŭ stvaralnikam i kiraŭnikom «Biełaruskaha zhurtavańnia vajskoŭcaŭ».
Jak i inšyja apazycyjnyja kandydaty ŭ prezydenty, byŭ aryštavany ŭ dzień vybaraŭ, asudžany na šeść hadoŭ pazbaŭleńnia voli pavodle abvinavačańnia ŭ arhanizacyi masavych biesparadkaŭ 19 śniežnia. Spačatku adbyvaŭ pakarańnie ŭ škłoŭskaj kalonii № 17, adnak u studzieni 2012 hodu ŭmovy adbyvańnia pakarańnia dla jaho zrabilisia bolš žorstkimi, jon byŭ pieraviedzieny ŭ mahiloŭskuju turmu № 4.
20 śniežnia 2011 hodu Mikałaj Statkievič zaklučyŭ u škłoŭskaj kalonii aficyjny šlub z Marynaj Adamovič, svajoj hramadzianskaj žonkaj.
25 lipienia sa Statkieviča źniali status «złosnaha parušalnika režymu», adznačyŭšy, što jon «nia staŭ na šlach vypraŭleńnia» — pra heta palitźniavoleny paviedamiŭ u liście da žonki. Status «złosnaha parušalnika» daje źniavolenamu prava kuplać tavary z ułasnych srodkaŭ nia bolš jak na adnu bazavuju vieličyniu (100 tysiač rubloŭ) za miesiac. Kali ž hety status zdymajecca, suma ŭzrastaje da 2–5 bazavych vieličyń u zaležnaści ad režymu. Dla Statkieviča jana pavialičyłasia da 200 tysiač rubloŭ.
Alaksandar Łukašenka nia raz zajaŭlaŭ, što jahonyja palityčnyja apanenty, jakija znachodziacca ŭ źniavoleńni, mohuć być vyzvalenyja pry ŭmovie, što napišuć prašeńnie ab pamiłavańni. Pavodle infarmacyi Maryny Adamovič, jaje mužu nia raz prapanoŭvali napisać prašeńnie. Paśla admovaŭ heta zrabić cisk na Statkieviča ŭzmacniaŭsia.
Padčas apošniaha spatkańnia z žonkaj eks-kandydat taksama prakamentavaŭ inicyjatyvu hramadzkich aktyvistaŭ z Babrujsku, jakija zaklikali hramadzian adpraŭlać palitźniavolenym listy z prapanovaj napisać na imia Łukašenki prašeńnie ab pamiłavańni. Pavodle słoŭ Maryny Adamovič, Mikałaj Statkievič nakont hetaha zajaviŭ: navat kali ŭsia demakratyčnaja hramadzkaść paprosić jaho ab hetym, jon na heta nia pojdzie.
