14 žniŭnia stali viadomyja niekatoryja padrabiaznaści spravy suproć kiraŭnikoŭ Biełkaapsajuzu, jakuju raspačali śledčyja KDB u kancy lipienia. Tady stała viadoma pra zatrymańni šerahu načalnikaŭ Biełkaapsajuzu, u tym liku staršyni Siarhieja Sidźko, jakija nibyta atrymlivali vialikija chabary. U pieršych paviedamleńniach fihuravali sumy da 500 tysiač dalaraŭ. Kiraŭnik presavaj słužby KDB Pavał Strech paviedamiŭ padrabiaznaści pra adnaho z zatrymanych — byłoha načalnika ŭpravy kapitalnaha budaŭnictva Biełkaapsajuzu Dźmitryja Kałodzieznaha.
«Kałodziezny, kali byŭ načalnikam upravy kapitalnaha budaŭnictva Biełkaapsajuzu, padčas realizacyi prajektu pa budoŭli kramy ŭ Lidzie na vulicy Tuchačeŭskaha dziejničaŭ u intaresach kamercyjnych struktur, naŭmysna złoŭžyvajučy svaim słužbovym stanoviščam. U vyniku Biełkaapsajuzu naniesienyja straty na sumu kala 700 miljonaŭ rubloŭ».
Ale ci maje da hetaha epizodu dačynieńnie były staršynia Biełkaapsajuzu Siarhiej Sidźko? Artur Strech na heta adkazvaje:
«U dadzieny momant KDB pravodzić śledčyja dziejańni pa vyjaŭleńni datyčnaści da dziejnaści Kałodzieznaha inšych kiraŭnikoŭ Biełkaapsajuzu».
Pavodle Artura Strecha, zatrymanyja kiraŭniki Biełkaapsajuzu i pradstaŭniki kamercyjnych struktur, jakija taksama prachodziać pa hetaj spravie ŭ jakaści padazronych, znachodziacca pad vartaj u SIZA KDB — tak zvanaj «amerykancy».
