Kiraŭnictva Rasii praciahvaje ličyć nieprymalnaj situacyju z zatrymańniem u Minsku hiendyrektara kampanii «Urałkalij» Uładzisłava Baŭmhiertniera.
Pra heta zajaviŭ vice-premjer RF Arkadź Dvarkovič 5 vieraśnia na sustrečy ŭ Maskvie sa svaim biełaruskim kaleham, pieršym vice-premjeram Uładzimiram
Siamaškam.
Jak paviedamlaje sajt rasijskaha ŭrada, Dvarkovič padkreśliŭ, što
Baŭmhiertnier znachodziŭsia ŭ Minsku i braŭ udzieł u sustrečy pa
zaprašeńni premjer-ministra Biełarusi Michaiła Miaśnikoviča. Zaprašeńnie było adpraŭlena «na padstavie damoŭlenaściaŭ na mižuradavym uzroŭni».
Arkadź Dvarkovič paćvierdziŭ, što Rasija maje namier pastavić u Biełaruś u 2013 hodzie 18,5 młn. ton nafty i, zychodziačy z hetaha, budzie ŭzhadniacca bałans na čaćviorty kvartał.
Jak zaznačajecca ŭ paviedamleńni, vice-premjery zakranuli pytańnie ab uzajemaadnosinach u śfiery sielskaj haspadarki. «Arkadź Dvarkovič zaznačyŭ, što ŭ Rasii jość pretenzii pa jakaści i biaśpiecy da šerahu pradukcyi biełaruskaj vytvorčaści. Aprača taho, rasijskija zacikaŭlenyja viedamstvy zaraz vyvučajuć situacyju z reekspartam pradukcyi z trecich krain pad vyhladam biełaruskich tavaraŭ», — zaznačajecca ŭ paviedamleńni.
Vice-premjery taksama abmierkavali chod realizacyi sumiesnych prajektaŭ pa raźvićci intehracyi rasijskich i biełaruskich pramysłovych pradpryjemstvaŭ u śfiery radyjoelektroniki, u kaśmičnaj śfiery, mašynabudavańni, chimičnaj halinie. Kansultacyi pa hetych kirunkach i sustrečy mižviedamasnych rabočych hrup Rasii i Biełarusi buduć praciahvacca na nastupnym tydni.
Pry hetym Arkadź Dvarkovič padkreśliŭ: «Uzajemadziejańnie pa ŭsich pytańniach, jakija abmiarkoŭvalisia na pieramovach, budzie zaležać ad raźvićcia situacyi ŭ cełym».