Pravaachoŭniki zatrymali čałavieka, što, jak miarkujecca, razasłaŭ listy z pahrozami vybuchu va ŭsie škoły ŭ Maładziečnie, paviedamili ŭ efiry pieradačy «Panarama» telekanała «Biełaruś 1».
U vypadku dokazu viny jamu pahražaje da 5 hadoŭ pazbaŭleńnia voli, a taksama pakryćcio pryčynienaj škody. Zatrymanaha dapytvajuć śledčyja. Imia mierkavanaha złamyśnika nie nazyvajecca. Miarkujecca, što heta miascovy žychar.
Siońnia ranicaj u dźvie škoły Maładziečna pryjšli pa pošcie listy, u jakich utrymlivalisia pahrozy padarvać navučalnyja ŭstanovy, kali na ŭkazany rachunak nie buduć pieraličanyja $10 tys.
Paźniej takija ž kanvierty pryjšli jašče ŭ vosiem škoł horada.
Orhany ŭnutranych spraŭ mamientalna adreahavali na pahrozu — usio školniki i piersanał škoł byli evakujavanyja, a ŭ budynki nakiravany piratechničnyja hrupy ŭnutranych vojskaŭ MUS, a taksama śpiecylnaje padraździaleńnie pa baraćbie z teraryzmam «Ałmaz». Usie škoły staranna abśledavali, nijakich vybuchovych pryład znojdziena nie było.
Upraŭleńniem Śledčaha kamiteta Biełarusi pa Minskaj vobłaści raspačata kryminalnaja sprava.
Dziejańni złamyśnika kvalifikavanyja jak zahadzia iłžyvaje paviedamleńnie ab niebiaśpiecy, što paciahnuła ciažkija nastupstvy (č.2 art.340 Kryminalnaha kodeksa Biełarusi). Pošukami zajmalisia supracoŭniki Ministerstva ŭnutranych spraŭ, Śledčaha kamiteta i Kamiteta dziaržaŭnaj biaśpieki.
