Pracentnyja staŭki pa kredytach u Biełarusi mohuć być administracyjnym čynam abmiežavanyja.
Pavodle infarmacyi BiełaPAN, pra adpaviedny prajekt dziaržrašeńnia stała viadoma na naradzie z udziełam kiraŭnikoŭ bankaŭ, jakaja prajšła jašče 11 vieraśnia. U dakumiencie razmova idzie pra abmiežavańnie roźnicy pamiž staŭkami pa kredytach i depazitach (da troch pracentnych punktaŭ).
U pryvatnaści, u prajekcie dziaržrašeńnia prapanoŭvajecca «ŭstanavić hraničny maksimalny pamier pracentnych stavak pa kredytach u biełaruskich rublach, što vydajucca bankami jurydyčnym asobam i indyvidualnym pradprymalnikam, u pamiery pracentnaj staŭki pa novych terminovych bankaŭskich układach u biełaruskich rublach z ulikam faktyčnych adličeńniaŭ u fond abaviazkovych reziervaŭ plus 3 pracentnyja punkty».
Kamiercyjnyja banki rychtujuć svaje adkazy na hety prajekt dziaržrašeńnia. Razam z tym, jak adznačyli bankiry, pryniaćcie padrychtavanaha rašeńnia ŭ ciapierašnich umovach moža faktyčna spynić praces kredytavańnia ekanomiki.
Pradstaŭniki bankaŭskaha siektara adznačajuć, što depazitnyja pradukty ŭ bankaŭ roznyja, adpaviedna, nie zusim zrazumieła, da jakoj staŭki pa ŭkładach moža być «pryviazanaja» staŭka pa kredytach.
«Pa depazitnych praduktach staŭki zusim roznyja, tamu pavinna być zrazumieła, pra jakuju staŭku pa ŭkładach idzie razmova — siaredniuju, kali siaredniaŭzvažanuju, to za jaki pieryjad jaje raźličvać. Na siońnia nie zrazumieły miechanizm, jak z hetym pracavać», — paviedamiŭ ekśpiert u bankaŭskich kołach.
Akramia taho, pavodle słoŭ bankiraŭ, pryviazka stavak pa kredytach da stavak pa depazitach nijak nie stykujecca ź siońniašniaj situacyjaj na mižbankaŭskim rynku, dzie košt rublovych resursaŭ pieravyšaje 60% hadavych.
«Resursnaja baza bankaŭ składajecca nie tolki z depazitaŭ. Pytańni likvidnaści bankaŭ vyrašajucca i na ŭzroŭni mižbankaŭskaha kredytavańnia, a tam (na mižbanku) ciapier staŭki pa kredytach znachodziacca na ŭzroŭni 65–70%», — adznačaje pradstaŭnik adnaho z bankaŭ.
Bankiry čakajuć, što kali rašeńnie ab pryviazcy stavak pa kredytach da stavak pa depazitach budzie pryniataje biez uliku koštu resursaŭ na mižbanku, banki prosta nie buduć kredytavać.
«Kali takoje rašeńnie (ab abmiežavańni pracentnych stavak pa kredytach) budzie pryniataje, jano paprostu bieź źmianieńnia situacyi na rynku błakuje finansavańnie biełaruskich pradpryjemstvaŭ u biełaruskich rublach», — padkreśliŭ ekśpiert.
Ciapier u bankaŭskaj sistemie nazirajecca vostry deficyt rublovaj likvidnaści.
Jak vynik staŭki pa adnadzionnych mižbankaŭskich kredytach na hetym tydni pieravysili 60% hadavych, chacia ŭ pačatku miesiaca składali mienš čym 40%.
Na hetym tydni asobnyja banki («Bank BiełVEB», «Biełarusbank») užo abjavili pra prypynieńnie vydačy niekatorych vidaŭ kredytaŭ. U pryvatnaści, «Biełarusbank» spyniŭ vydaču spažyvieckich kredytaŭ, «Bank BiełZEB» prypyniŭ pryjom zajavak ad fizičnych asob na žyllovyja i aŭtamabilnyja kredyty.
