U Minsku čakajuć čarhi na raźmiaščeńnie ŭ damy-internaty psichanieŭrałahičnaha profilu 422 čałavieki, paviedamiła namieśnik staršyni kamiteta pa pracy, zaniataści i sacyjalnaj abaronie Minharvykankama Iryna Dudka na pres-kanfierencyi ŭ Minsku 1 kastryčnika.
U psichanieŭrałahičnyja internaty źmiaščajucca hramadzianie, jakija dasiahnuli piensijnaha ŭzrostu, invalidy I i II hrupy, jakija pryznany niedziejazdolnymi, stracili poŭnuju ci častkovuju zdolnaść da samaabsłuhoŭvańnia, majuć patrebu ŭ dohladzie, dapamozie, bytavym i miedycynskim absłuhoŭvańni. Znachodžańnie tam biaspłatnaje.
U damy-internaty ahulnaha typu čarhi niama, padkreśliła Dudka.
Da taho ž siońnia, 1 kastryčnika, paśla rekanstrukcyi i ramontu adkryŭsia dom-internat dla pažyłych i piensijanieraŭ na vulicy Vaŭpšasava na 400 miescaŭ. Usiaho ŭ Minsku pracuje dzieviać damoŭ-internataŭ.
U domie-internacie ahulnaha profilu raźmiaščajuć pažyłych na płatnaj asnovie ŭ vypadku, kali ŭ pastajalca jość dzieci. Košt — kala 2,5 młn. rubloŭ za miesiac.
U vypadku kali ŭ žylca doma-internata niama svajakoŭ, jakija abaviazany pa zakonie jaho ŭtrymlivać, ci jany niepracazdolnyja, płata spahaniajecca šlacham vyličeńniaŭ ź piensii (na ruki vydajecca 10% piensii pastajalca). Dudka padkreśliła, što sučasny padychod — heta zachavańnie dla pažyłych ludziej siamji, bo mienavita tam čałaviek moža poŭnaściu zachavać svaje sacyjalnyja suviazi i zvykły ład žyćcia.
Hałoŭny ŭrač haradskoha centra zdaroŭja Ivan Taraškievič padkreśliŭ, što ŭ Biełarusi ŭsio čaściej pažyłych baćkoŭ dzieci starajucca «ŭpichnuć u internaty, dzie, jak kažuć, dažyvajuć tyja, chto nie paśpieŭ pamierci».
Adkaznaść za starych nieabchodna vychoŭvać z rańniaha dziacinstva, adznačyŭ Taraškievič. Nieabchodna tłumačyć dziciaci, što dziadula i babula — heta nie tolki ludzi, «jakija mohuć kupić šakaładku, ale i svajaki, jakija patrabujuć kłopatu».
