Hramadskaje abjadnańnie «Maładyja chryścijanskija demakraty» (MCHD) maje namier vyłučyć na miascovych vybarach 2014 hoda prykładna 50 kandydataŭ u deputaty.
Pra heta było zajaŭlena 20 kastryčnika na ŭstanoŭčym źjeździe arhanizacyi ŭ Minsku.
Delehaty ŭstanoŭčaha źjezda MCHD miarkujuć, što vybary ŭ Biełarusi nie mohuć być demakratyčnymi, pakul u źniavoleńni znachodziacca palitźniavolenyja. Aprača taho, na ich dumku, vybary nielha ličyć spraviadlivymi z ulikam nierehistracyi ŭ krainie demakratyčnych partyj i arhanizacyj, adsutnaściu svabody ŚMI, a taksama adsutnaściu na vybarach realnaha kantrolu za padlikam hałasoŭ.
«Kampanija hetak zvanych miascovych vybaraŭ, jakuju rychtuje Jarmošyna pa starym scenaryi, źjaŭlajecca niedemakratyčnaj. Lubyja vyniki takich vybaraŭ my pryznajom nielehitymnymi», — havorycca ŭ zajavie delehataŭ źjezda.
Razam z tym udzielniki źjezda ličać prymalnym va ŭmovach adsutnaści nižniaha parohu jaŭki vybarščykaŭ na miascovych vybarach praviadzieńnie infarmacyjnaj kampanii praz vyłučeńnie kandydataŭ u deputaty. Pry hetym pradstaŭniki MCHD ličać «niedapuščalnym zaklik da hramadzian krainy brać udzieł u samim hałasavańni».
MCHD płanuje vykarystoŭvać miascovuju vybarčuju kampaniju dla «daniasieńnia infarmacyi ab złačynstvach, jakija ažyćciaŭlaje dziejučy režym, a taksama dla arhanizacyi moładzi na sumiesnyja dziejańni pa abaronie svaich pravoŭ». «My zaklikajem usie maładziožnyja demakratyčnyja arhanizacyi ŭ krainie abjadnoŭvacca na hlebie pryznańnia vybaraŭ u miascovyja saviety niedemakratyčnymi i nielehitymnymi. Zaklikajem abjadnoŭvacca dla praviadzieńnia sumiesnych nacyjanalnych kampanij, nakiravanych na abaronu pravoŭ maładych ludziej», — zajavili delehaty ŭstanoŭčaha źjezda MCHD.
