Prezident Hruzii Michaił Saakašvili paśmiarotna prysvoiŭ byłomu prezidentu krainy Źvijadu Hamsachurdzia i jaho paplečniku Mierabu Kastava zvańnie nacyjanalnych hierojaŭ.
Hamsachurdzia i Kastava
Adpaviednuju zajavu prezident zrabiŭ na adkryćci miemaryjała zahinułym voinam u vioscy Kvema Ałvaani.
Saakašvili nazvaŭ Hamsachurdzia śvietačam nacyjanalnaj idei, jaki zmahaŭsia za svabodu svajoj krainy jašče tady, kali amal nivodny hruzin pra heta navat nie dumaŭ.
Pavodle słoŭ prezidenta, nie mienš važny ŭkład u zdabyćcio Hruzijaj svabody ŭnios i Kastava.
Źvijad Hamsachurdzia i Mierab Kastava arhanizavali ŭ Hruzii pieršuju apazicyjnuju savieckaj uładzie arhanizacyju jašče ŭ 1954 hodzie — «Harhaśliani».
Na praciahu nastupnych 30 hadoŭ ich nieadnarazova zatrymlivali za antysavieckuju dziejnaść.
U 1973 h. jany zasnavali arhanizacyju pa abaronie pravoŭ čałavieka, Kastava ŭznačaliŭ Hruzinski Chielsinkski kamitet.
Samym hučnym staŭ ich aryšt u 1977 hodzie.
Tady Hamsachurdzia paśla aficyjnaha raskajańnia pamiłavali, a Kastava pravioŭ u turmie nastupnyja dziesiać hadoŭ u Sibiry. U 1978 h. Kanhres ZŠA naminavaŭ Hamsachurdzia i Kastava na Nobieleŭskuju premiju miru.
Vyzvaliŭšysia ź miescaŭ pazbaŭleńnia voli ŭ kancy 1980-ch, Kastava uvajšoŭ u lik lidaraŭ ruchu za adździaleńnie Hruzii. Jon byŭ adnym z arhanizataraŭ krasavickaj demanstracyi ŭ Tbilisi 1989 hoda, jakuju razahnali savieckija vojski. Praź niekalki miesiacaŭ Kastava, jaki zajmaŭsia aproč palityčnaj dziejnaści litaraturaj i muzykaj, zahinuŭ u aŭtakatastrofie pry niavyśvietlenych abstavinach.
Hamsachurdzia ŭ 1990 hodzie pryjšoŭ da ŭłady i staŭ pieršym prezidentam niezaležnaj Hruzii, adnak užo ŭ 1992 hodzie jaho zrynuli ŭ chodzie pieravarotu. U 1993 hodzie jon zahinuŭ, chavajučysia ad uradavych vojskaŭ u vioscy Dźvieli Chibuła.
Pa aficyjnych źviestkach, Hamsachurdzia pakončyŭ z saboj, adnak isnuje viersija, pavodle jakoj jaho zabili.
