Pieršy namieśnik premjer-ministra Biełarusi Uładzimir Siamaška ličyć nieabchodnym pieraŭtvareńnie Ministerstva pramysłovaści ŭ Ministerstva pramysłovaj palityki.
Pra heta jon zajaviŭ 31 kastryčnika, adkazvajučy na pytańnie parłamientaryjaŭ na pasiadžeńni abiedźviuch pałat Nacyjanalnaha schodu.
«Z-za taho, što idzie praces akcyjanavańnia, pryvatyzacyi, praces stvareńnia intehracyjnych rasijska-biełaruskich prajektaŭ, nam treba pierahladać pytańnie kiravańnia pramysłovaściu z halinovaha pryncypu na funkcyjanalny. Tamu što ŭsio bolš i bolš pradpryjemstvaŭ stanoviacca pryvatnymi, sumiesnymi, i treba stvarać adzinyja praviły pracy», — padkreśliŭ Siamaška.
Pavodle jaho słoŭ, nieabchodna ź Ministerstva pramysłovaści «stvaryć funkcyjanalnaje Ministerstva pramysłovaj palityki, jakoje budzie vyrašać zadačy». «Siońnia nieadnaznačnaje staŭleńnie da hetaha pracesu. Maja pazicyja, što na heta iści treba, chacia łomka niaprostaja, ciažkaja. U Ministerstvie pramysłovaści ŭ mnohich jość niepryniaćcie, jany nie razumiejuć, jak buduć pracavać. Tam paśla skaračeńnia 30% zastałosia 127 čałaviek», — paviedamiŭ pieršy vice-premjer.
«Pytańnie nie ŭ tym, jak u Minpramie budzie, a jak my spravimsia, my ledź spraŭlajemsia z prablemami zatykańnia dzirak na prablemnych pradpryjemstvach, jak zarpłatu płacić i hetak dalej», — skazaŭ Siamaška. Jon miarkuje, što pytańni kiravańnia nieabchodna pierahledzieć u cełym pa krainie. Pavodle jaho słoŭ, heta tyčycca niekatorych ministerstvaŭ i kancernaŭ.
«Hety praces dastatkova ciažki, niaprosty. Ja pastaviŭ zadaču, kab ministr pramysłovaści ŭžo da kanca hetaha hoda prapanavaŭ svajo bačańnie ab struktury, kolkaści, funkcyi, ich vykanańni. Z takim raźlikam, kab da siaredziny 2014 hoda my mieli rašeńnie na zakanadaŭčym uzroŭni, jak minimum ukaz prezidenta, a moža i zakon. Kab my da kanca hoda ŭžo sfarmiravali takoje ministerstva, a ŭ 2015 hodzie jano b paŭnakroŭna pracavała. My pavinny stvaryć takoje Ministerstva pramysłovaj palityki, jakoje pracavała b bolš efiektyŭna, čym Minpram», — zaznačyŭ pieršy vice-premjer.
«Pramysłovaja palityka ŭ Biełarusi była, jość i budzie, i heta daje svaje finansavyja vyniki dla ekanomiki», — padkreśliŭ jon. Pry hetym zaznačyŭ, što pramysłovaja vytvorčaść uzrastała: «Pa 9% kožny hod dadavali». «Siońnia, kali my ŭpali, nas pačali klavać», — paskardziŭsia Siamaška.
