Ukaz №760 nie admieniać i nie pasunuć terminy jaho realizacyi ni na dzień. Andrej Tur: «Nu nabudujem my jašče kolki dziasiatkaŭ hipermarkietaŭ, a pachodžańnie, jakaść i asartyment ichnych tavaraŭ biezumoŭna nie na karyść drobnych handlaroŭ».
Biełaruski ŭrad nie zadavoleny tempami rearhanizacyi indyvidualnych pradprymalnikaŭ u pryvatnyja ŭnitarnyja pradpryjemstvy. Pra heta na pres‑kanferencyi, pryśviečanaj mieram, što prymaje dziaržava pa ŭrehulavańni prablemaŭ u pradprymalnickim asiarodździ, paviedamiŭ namieśnik ministra ekanomiki Andrej Tur. Pa stanie na 15 vieraśnia ŭ PUP pieraaformilisia 169 indyvidualnych pradprymalnikaŭ. Nahadajem, što ahulnaja kolkaść zarehistravanych IP składaje kala 200 tys. čałaviek.
Namieśnik ministra raspačaŭ pres‑kanferencyju z ultymatumu pradprymalnikam: ukaz №760 nichto nia budzie admianiać, ź jaho nia vydalać pałažeńnie ab zabaronie najmu starońnich asobaŭ, a terminy jaho realizacyi nie pasunucca ni na dzień. Hetyja pytańni navat nie razhladalisia ŭ ministerstvie. Andrej Tur abvinavaciŭ niekatoryja ŚMI ŭ tym, što tyja dajuć niepravieranuju infarmacyju datyčna ŭkazu №760 i tym samym raschałodžvajuć pradprymalnikaŭ:
«Heta robicca dla taho, kab naradzić u asiarodku «ipešnikaŭ» nieapraŭdanyja čakańni».
Namieśnik ministra nieadnakroć zajaviŭ, što havorka viadziecca nie pra vyniščeńnie pradprymalnikaŭ, jak klasy.
«Dziaržava choča dapamahčy pradprymalnikam vyjści na jakasna inšy ŭzrovień raźvićcia».
U jakaści prykładu jon pryvioŭ efektyŭnaść pradprymalnickaj dziejnaści ŭ zaležnaści ad jaje formy: u pieraliku na adnaho čałavieka indyvidualny pradprymalnik atrymlivaje 17 młn. rub. prybytku, jurydyčnaja asoba maje 102 młn. rub. Pavodle A. Tura, pryvatnyja ŭnitarnyja pradpryjemstvy, a ich u Biełarusi zarehistravana kala 37 tys., zabiaśpiečvajuć da 10,5% ad ahulnaj kolkaści padatkaŭ, IP — trochi bolš za 2%. Pry hetym namieśnik ministra ekanomiki pryznaŭ, što ministerstvam nie pravodzilisia raźliki mahčymaha ŭpłyvu rearhanizacyi IP na źmianieńnie spažyvieckich koštaŭ. Pa‑pieršaje, abjektyŭna zrabić heta nie dazvalaje mizernaja kolkaść tych, chto pieraaformiŭsia ŭ PUP, pa‑druhoje, takaja zadača ŭvohule nia staviłasia.
A. Tur vykazaŭ upeŭnienaść, što ŭ kančatkovym vyniku pradprymalniki vymušanyja buduć pad ciskam abjektyŭnych pryčynaŭ źmianić formu dziejnaści.
«Nu nabudujem my jašče kolki dziasiatkaŭ hipermarkietaŭ, a pachodžańnie, jakaść i asartyment ichnych tavaraŭ biezumoŭna nie na karyść drobnych handlaroŭ».
Vypłačvać kampensacyju ŭ suviazi sa zvalnieńniem persanału paśla ŭstupleńnia ŭ siłu ŭkazu №760 buduć samyja pradprymalniki. Pamier kampensacyi — siaredni dvuchtydniovy zarobak.
Pradprymalniki tym časam nie źbirajucca adstupacca. Akramia niaznačnaj kolkaści tych, chto pieraaformiŭsia ŭ PUP, pra heta śviedčyć i toj fakt, što ciaham apošnich troch miesiacaŭ zarehistravana bolš za 11 tys. novych IP. Sp. Tur pryznaŭ, što takim čynam adbyvajecca drabnieńnie biznesu.
Ciapier čytajuć
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii3
Kamientary