Upraŭleńniem Śledčaha kamiteta pa Minskaj vobłaści zavieršana papiaredniaje rasśledavańnie pa kryminalnaj spravie ŭ dačynieńni da byłoha namieśnika staršyni Barysaŭskaha rajvykankama. Pra heta paviedamiła aficyjny pradstaŭnik USK Taćciana Biełanoh.
Nahadajem, čynoŭnik byŭ zatrymany ŭ krasaviku hetaha hoda pa padazreńni ŭ atrymańni chabaru ŭ pamiery 13 tysiač dołaraŭ za spryjalnaje vyrašeńnie pytańnia, jakoje ŭvachodzić u jaho kampietencyju. Paśla hetaha ŭ dačynieńni da padazronaha była raspačata sprava pa č. 3 art. 430 Kryminalnaha kodeksa (atrymańnie chabaru słužbovaj asobaj, jakaja zajmaje adkaznaje stanovišča, u asabliva bujnym pamiery). Čynoŭnika źniavolili pad vartu.
Jak paviedamiła Taćciana Biełanoh, u pracesie rasśledavańnia kryminalnaj spravy byli vyjaŭlenyja dadatkovyja epizody supraćpraŭnaj dziejnaści byłoha čynoŭnika: bolš čym 10 złačynstvaŭ, źviazanych z atrymańniem bujnoha chabaru, dva złačynstvy, jakija tyčacca pieravyšeńnia ŭłady i słužbovych paŭnamoctvaŭ, epizod ź niezakonnym nabyćciom, zachoŭvańniem, pieravozkaj i našeńniem bojeprypasaŭ i zamacham na machlarstva.
Ahulnaja suma niezakonna atrymanych słužbovaj asobaj hrašovych srodkaŭ skłała bolš čym 35.000 dołaraŭ ZŠA.
Padčas papiaredniaha rasśledavańnia praviedzieny vialiki abjom śledčaj raboty, dapytana bolš čym 100 śviedak, nakładzieny aryšt na majomaść i hrašovyja srodki abvinavačvanaha na sumu bolš za 315 miljonaŭ rubloŭ.
Byłomu čynoŭniku vystaŭlena kančatkovaje abvinavačańnie pa piaci składach złačynstvaŭ: atrymańnie chabaru ŭ bujnym pamiery, učynienaje asobaj, jakaja zajmaje adkaznaje stanovišča (č. 3 art. 430 KK); pieravyšeńnie ŭłady i słužbovych paŭnamoctvaŭ, učynienaje z karyślivaj zacikaŭlenaści asobaj, jakaja zajmaje adkaznaje stanovišča (č. 3 art. 426 KK); padbuchtorvańnie da dačy chabaru ŭ bujnym pamiery (č. 5 art. 16, č. 2 art. 431 KK); zamach na machlarstva, učynienaje ŭ bujnym pamiery (č. 1 art. 14 č. 3 art. 209 KK); niezakonnyja nabyćcio, zachoŭvańnie, pieravozka i našeńnie bojeprypasaŭ (č. 2 art. 295 KK).
Miera strymańnia ŭ vyhladzie źniavoleńnia pad vartu nie źmianiałasia.
Materyjały kryminalnaj spravy pieradadzienyja ŭ prakuraturu dla nakiravańnia ŭ sud.
Kamientary