Darahija aŭtamabili pad dypłamatyčnymi numarami biełaruskaj ambasady ŭ Rasijskaj Fiederacyi nabyty na asabistyja srodki hanarovym konsułam Biełarusi ŭ Rasii.
Pra heta BiełaPAN paviedamiŭ pres-sakratar Ministerstva zamiežnych spraŭ Andrej Savinych.
Jon adznačyŭ, što instytut hanarovych konsułaŭ — heta raspaŭsiudžanaja praktyka, jakaja vykarystoŭvajecca usimi krainami śvietu, paviedamlaje partał naviny.by.
«Tolki ŭ Biełarusi dziejničajuć bolš za 20 hanarovych konsułaŭ zamiežnych dziaržaŭ. Respublika Biełaruś vydała konsulski patent 56 hramadzianam zamiežnych dziaržaŭ», — skazaŭ Savinych.
Pavodle jaho słoŭ, statusam hanarovaha konsuła sa zhody dziaržavy, jakaja jaho prymaje, nadzialajucca aŭtarytetnyja i zamožnyja hramadzianie krainy znachodžańnia, jakija akazvajuć važnaje sadziejničańnie ŭ raźvićci dvuchbakovych suviaziaŭ. «Dziejnaść hanarovych konsułaŭ moža być vielmi raznastajnaj.
Tak, zusim niadaŭna hanarovy konsuł Biełarusi na Filipinach aktyŭna zajmaŭsia vyśviatleńniem situacyi ź biełaruskimi hramadzianami paśla razburalnaha tajfuna», — padkreśliŭ Savinych.
Pry hetym pres-sakratar admoviŭsia paviedamić, chto mienavita z hanarovych konsułaŭ nabyŭ darahija aŭtamabili. «Uličvajučy kantekst źjaŭleńnia hetych materyjałaŭ, ja pavinien atrymać zhodu hetaha čałavieka, kab nazvać jahonaje proźvišča", — skazaŭ Andrej Savinych, udakładniŭšy, što «pytańnie ŭzhadnieńnia moža zaniać tydzień-dva».
Na sajcie ambasady Biełarusi ŭ Rasii nazvany ŭsie čatyry hanarovych konsuła: Ihar Makaraŭ (Maskva ), Aleh Nieviarkievič (Krasnadar), Alaksandr Krupadzioraŭ (Murmansk), Uładzimir Šuhla (Ciumień).
Ihar Makaraŭ (uličvajučy, što na mašynach maskoŭskija numary i zaŭvažanyja jany mienavita ŭ stalicy Rasii, łahična vykazać zdahadku, što aŭto naležać mienavita jamu) — rasijski miljarder, uładalnik mižnarodnaj hrupy kampanij «Itera».
Aleh Nieviarkievič źjaŭlajecca dyrektaram sanatoryja «Biełaja Ruś» (Tuapse) Kiraŭnictva spravami prezidenta Biełarusi z 1990 hoda. Dvojčy abiraŭsia deputatam Zakanadaŭčaha schodu Kubani.
Alaksandr Krupadzioraŭ byŭ staršynioj savieta dyrektaraŭ AAT «Kolskaja hornamietałurhičnaja kampanija». Ź śniežnia 2011 hoda źjaŭlajecca deputatam Murmanskaj abłasnoj dumy piataha sklikańnia. Siabra palitrady i prezidyuma partyi «Adzinaja Rasija». Staršynia savieta nacyjanalnaj kulturnaj aŭtanomii «Biełarusy Murmana».
Uładzimir Šuhla byŭ načalnikam hałoŭnaha ŭpraŭleńnia handlu Ciumienskaha abłvykankama, potym uznačaliŭ «Chołdynhavuju kampaniju handlovy dom «Manhazieja». Źjaŭlajecca členam Sajuza piśmieńnikaŭ Biełarusi i ŭznačalvaje Ciumienskuju haradskuju supołku biełarusaŭ.
Nahadajem, u internecie źjavilisia fatahrafii, zroblenyja karystalnikam sietki «Instahram» @ RublevkaLive, na jakich namalavanyja darahija aŭtamabili «Bentli» i «Parše Kajen» z čyrvonymi dypłamatyčnymi numarami i kodam 150. Hety kod zamacavany za Respublikaj Biełaruś.
«Biełaruskija dypłamaty na takich mašynach nie jeździać. U pasolskim parku takich vidaŭ aŭtatranspartu ŭ nas niama. U pasolstvie biełaruskija dypłamaty, hramadzianie Respubliki Biełaruś, jakija źjaŭlajucca supracoŭnikami ambasady, majuć dypłamatyčnyja kartki, akredytavany pry MZS RF, takoha aŭtatranspartu ŭ pasolstvie niama.
Mahčymaści našaj ambasady nie dazvalajuć mieć mašyny takoha kłasa», — zajaviŭ u kamientary BiełaPAN pradstaŭnik pres-słužby biełaruskaj dypmisii.
U rasijskaj internet-bazie numarnych znakaŭ transpartnych srodkaŭ siarod mašyn z numarami biełaruskaj ambasady jość jak zafiksavany na fota «Parše Kajen» z numaram 150D172, tak i jašče niekalki takich ža mašyn z numarami 150D118 i 150D159.
Kamientary