Biźnies-vymiareńnie Uschodniaha partniorstva pavinna stać klučavym, tamu što moža «padciahnuć» astatnija śfiery supracoŭnictva. Pra heta zajaviŭ BiełaPAN ministr ekanomiki Biełarusi pierad pačatkam plenarnaha pasiadžeńnia biźnies-forumu Uschodniaha partniorstva ŭ Vilniusie 28 listapada.
«Mienavita biźnies-vymiareńnie pavinna źjaŭlacca fundamientam Uschodniaha partniorstva, tamu što pieradača viedaŭ i technałohij značna važniejšaja za patrabavańni vykanańnia tych praviłaŭ i norm pavodzin, jakija jość u Jeŭrasajuzie», — zajaviŭ Snapkoŭ.
Na dumku ministra ekanomiki, supracoŭnictva Biełarusi ź ES było b bolš praduktyŭnym, kali b ekanomika stała asnovaj va Uschodnim partniorstvie.
«Ja ŭpeŭnieny, što heta moža padciahnuć astatnija śfiery. Ekanomika piarvičnaja. I žyćcio pakazvaje, što ŭzajemapraniknieńnie biźniesu źjaŭlajecca piarvičnymi i bolš kamfortnymi drajvierami ŭzajemaadnosin na astatnich uzroŭniach», — padkreśliŭ Mikałaj Snapkoŭ.
Ministr zaznačyŭ, što ŭ Biełarusi i Jeŭropy niama nijakich supiarečnaściaŭ u śfiery biźniesu: «My pavinny rabić toje, što robim: my sustrakajemsia ź ministrami, znachodzim kantakty, našy biźnies-sajuzy razmaŭlajuć, znachodziać punkty sudakranańnia. Charaktar inviestycyj u našu krainu, charaktar našych inviestycyj u krainy ES havoryć pra toje, što nijakich supiarečnaściaŭ u hetym niama».
Mikałaj Snapkoŭ pryvioŭ prykład paśpiachovych inviestycyjnych prajektaŭ, ažyćcioŭlenych u Biełarusi šviejcarskaj firmaj Stadler i aŭstryjskaj Kronospan.
«Dla sacyjalna-adkaznaha biźniesu palityčnyja aśpiekty vielmi adnosnyja. Im patrebnyja kamfortnaje asiarodździe, kvalifikavanaja rabočaja siła i rynki zbytu pradukcyi. Heta ŭsio jość u Biełarusi», — upeŭnieny ministr ekanomiki.
