U top-60 čynoŭnikaŭ Biełarusi až 21 piensijanier

«Naša Niva» prapanuje tradycyjny ahlad łukašenkaŭskich elitaŭ. Papiarednija byli zroblenyja ŭ 2009 i 2011 hadach.

Dla razhladu my ŭziali premjer-ministra, vice-premjeraŭ, śpikieraŭ abiedźviuch pałat parłamienta, staršyń asnoŭnych sudoŭ, pradstaŭnikoŭ Administracyi prezidenta, hienprakurora, kiraŭnika spravami prezidenta, ministraŭ, staršyń dziaržaŭnych i nacyjanalnych kamitetaŭ, staršyń abłvykankamaŭ, staršyniu CVK i staršyniu Nacbanka. Vakantnyja pakul što pasady staršyni Vyšejšaha haspadarčaha suda (Viktar Kamiankoŭ syšoŭ na stanie zdaroŭja) i dziaržsakratara Rady biaśpieki (Malcaŭ pieraviedzieny ŭ Mytny kamitet).

U paraŭnańni z 2011-m śpis čynoŭnikaŭ abnoŭleny na tracinu. 20 čynoŭnikaŭ ci ŭpieršyniu atrymali takuju vysokuju pasadu, ci znoŭ viernutyja ŭ vierchnija ešałony (Prakapovič, Šejman, Patupčyk).

Z Hruzijaj nie paraŭnać

Siaredni ŭzrost biełaruskaha čynoŭnika najvyšejšaha ranhu skłaŭ ažno 55,8 hoda. U paraŭnańni ź minułym zamieram jon vyras bolš čym na hod (54,4). Ale taki «siaredni čynoŭnik» usio adno maładziejšy za Łukašenku, jaki naleta dasiahnie piensijnaha vieku. U 1994m, pryjšoŭšy da ŭłady, jon bolš daviaraŭ maładym, čym ciapier.

Ujavicie tolki, što siaredni viek hruzinskaha ŭrada padčas prezidenctva Michaiła Saakašvili składaŭ 38 hadoŭ! Pryčym tam było šmat tych, chto atrymaŭ vydatnuju zachodnuju adukacyju. U Biełarusi ž za miažoj vučylisia tolki staršynia Mahiloŭskaha abłvykankama Piatro Rudnik (skončyŭ Drezdenski techničny ŭniviersitet), a taksama ministr zamiežnych spravaŭ Uładzimir Makiej (vučyŭsia ŭ Aŭstryjskaj dypłamatyčnaj škole). Jašče jość pamočnik prezidenta pa pytańniach ekanomiki Kirył Rudy, jaki stažyravaŭsia ŭ Čykaha.

Jašče adno paraŭnańnie z Hruzijaj. Ciapierašniamu jaje premjeru Irakliju Harybašvili ŭsiaho 31 hod! Naš premjer Michaił Miaśnikovič starejšy bolš čym udvaja — jamu 63.

Samy małady — Švied

Samy małady hruzinski ministr — kiraŭnik MUS Alaksandr Čykaidze. Jamu ŭsiaho 28 hadoŭ. Samy małady biełaruski ministr — 40hadovy Andrej Šorac sa śfiery ŽKH. Stolki ž kiraŭniku kamiteta sudovych ekśpiertyz Andreju Šviedu.

Dva hady tamu najmaładziejšym byŭ Pavieł Łatuška, jakoha pieraviali pasłom u Francyju.

Nie varta taksama zabyvać i pra pamočnika prezidenta ŭ pytańniach biaśpieki Viktara Łukašenku (37).

Sarakahadovych u viarchach niamnoha. Siarod ich ministr justycyi Aleh Śližeŭski (41), staršynia kamiteta pa navucy i technałohijach Alaksandr Šumilin (42), ministr ekanomiki Mikałaj Snapkoŭ (44) i ministr sportu i turyzmu Alaksandr Šamko (45).

Hierantakratyja — ułada starych. Takoj formie kiravańnia ŭłaścivy praźmierny kansiervatyzm i niahnutkaść, što viadzie ŭrešcie krainu da zaniapadu. Niešta padobnaje nazirałasia ŭ SSSR u epochu poźniaha zastoju, kali siaredni viek členaŭ Palitbiuro CK KPSS pieravaliŭ za 70 hadoŭ.

Dvaccać adzin piensijanier

Takoj vializnaj kolkaści piensijanieraŭ va ŭradzie Łukašenki nie było jašče nikoli. I siarod ich znakavyja ludzi: Michaił Miaśnikovič, vicepremjery Siamaška, Tozik i Prakapovič, pieršy namieśnik kiraŭnika Administracyi prezidenta Alaksandr Radźkoŭ, staršynia KDK Alaksandr Jakabson, staršynia Nacbanka Nadzieja Jermakova, ministr adukacyi Siarhiej Maskievič, «pamiežnik» Leanid Malcaŭ, hubiernatar Brestčyny Kanstancin Sumar, staršynia CVK Lidzija Jarmošyna…

Praz hoddva piensijanierami stanuć vice-premjer Michaił Rusy, staršynia Kanstytucyjnaha suda Piatro Mikłaševič, ministr abarony Juryj Žadobin, kiraŭnik Biełstata Uładzimir Zinoŭski…

Starejšynaj čynoŭnickaha korpusu praciahvaje zastavacca śpikier Savieta respubliki Anatol Rubinaŭ, jakomu ŭžo 74 hady. Śledam iduć Valancin Sukała z Kanstytucyjnaha suda i Piatro Prakapovič — im pa 71.

Niezdarma ž, pryznačajučy 52-hadovaha Siamiona Šapiru staršynioj Minabłvykankama, Łukašenka skazaŭ pra «juny viek» čynoŭnika. Na fonie mnohich kaleh sapraŭdy zusim jašče maładzion.

Prafiesary

Siarod 60 čynoŭnikaŭ jość dzieviaciora prafiesaraŭ. Heta Miaśnikovič, Tozik, Rubinaŭ, Radźkoŭ, Maskievič, Malcaŭ, Šumilin, Šapira i staršynia Viciebskaha abłvykankama Kosiniec. Jość jašče Viktar Šejman, jaki paznačajecca taksama prafiesaram, ale sapraŭdnaść jahonych dakumientaŭ sumnieŭnaja.

«Zamiežniki»

Źmienšyłasia kolkaść čynoŭnikaŭ, jakija naradzilisia nie ŭ Biełarusi. Dva hady tamu ich było adzinaccać, ciapier — dzieviać (15%). Źviartaje ŭvahu, što ŭpieršyniu za doŭhi čas KDB uznačaliŭ biełarus — Valeryj Vakulčyk.

Adkul rodam «našy zamiežnyja» ŭradoŭcy? Ministr abarony Juryj Žadobin i ministr unutranych spravaŭ Ihar Šunievič pryjšli na śviet va Ukrainie.

Z Rasii pachodziać kiraŭnik Administracyi prezidenta Andrej Kabiakoŭ (Maskva), ministr pa nadzvyčajnych situacyjach Uładzimir Vaščanka, ministr infarmacyi Aleh Pralaskoŭski (Padmaskoŭje), ministr pracy Marjana Ščotkina (Murmanskaja vobłaść), ministr architektury Anatol Čorny (Kalinihradskaja vobłaść), staršynia vajskova-pramysłovaha kamiteta Siarhiej Huruloŭ (Čyta) i novy staršynia Hrodzienskaha abłvykankama Uładzimir Kraŭcoŭ (Leninhradskaja vobłaść).

Tutejšyja

Z tych 51 čynoŭnika, što naradzilisia ŭ Biełarusi, tryccać dva — viaskoŭcy. Heta navat bolej, čym dva hady tamu. 14 čałaviek naradzilisia ŭ rajonnych ci abłasnych centrach. A jašče piaciora minčukoŭ — Sukała, Šamko, ministr finansaŭ Charkaviec, ministr kultury Śviatłoŭ i staršynia Minharvykankama Mikałaj Ładućka.

Kali brać asobnyja centry, to ŭ lidarach akazalisia Drahičynski i Kalinkavicki rajony. Z zachodniaj Bieraściejščyny pachodziać staršynia KDB Valeryj Vakulčyk (Radastava), ministr achovy zdaroŭja Vasil Žarko (Leśniki) i ministr pramysłovaści Dźmitryj Kaciarynič (Huta). Z Homielščyny — Siamaška (Kalinkavičy), Tozik (Kazansk), staršynia dziaržaŭnaha kamiteta pa standartyzacyi Viktar Nazaranka (Alaksandraŭka).

Dva čałavieki z Barysaŭščyny — ministr suviazi Pancialej i staršynia kamiteta pa majomaści Hieorhij Kuźniacoŭ. Z Babrujska — ministr handlu Valancin Čakanaŭ i «mytnik» Alaksandr Špileŭski. Z Mahilova — Rubinaŭ i Snapkoŭ. Z Hrodna — hienprakuror Kaniuk i Śližeŭski.

A Uładzimir Makiej i ministr pa padatkach i zborach Uładzimir Pałujan naradzilisia ŭ adnoj vioscy — Niekraševičy (Karelicki rajon).

Jość taksama pa adnym pradstaŭniku Niaśvižskaha, Krasnapolskaha, Pružanskaha, Žytkavickaha, Loźnienskaha, Vilejskaha, Bychaŭskaha, Lidskaha, Klimavickaha, Homielskaha, Chocimskaha, Voranaŭskaha, Navahrudskaha, Słuckaha, Ščučynskaha, Śvietłahorskaha, Naraŭlanskaha, Mazyrskaha, Viciebskaha, Asipovickaha, Słonimskaha, Hłybockaha, Lelčyckaha, Biarozaŭskaha, Łuninieckaha, Aršanskaha, Rečyckaha, Lubanskaha i Brahinskaha rajonaŭ.

Źviartaje ŭvahu adsutnaść u śpisie «škłoŭskich». Chacia mnohija, jak namieśnik kiraŭnika Administracyi Valery Ivanoŭ ci Jermakova, pracavali ŭ hetym rajonie. Niama taksama nivodnaha bieraściejca.

Z Hrodzienščyny mała

Miesca naradžeńnia — heta adno, a zusim inšaje — miesca, dzie pačynałasia karjera, dzie składaŭsia jak śpiecyjalist. Dyk voś siarod top60 jość tolki dva čałavieki, jakija pryjechali ŭ stalicu z Hrodzienščyny — heta Maskievič i Śližeŭski. Čaćviora z Brestčyny — Prakapovič, Kalinin, Žarko i Sumar.

Zatoje až adzinaccać čałaviek pačynali svoj pracoŭny šlach na Mahiloŭščynie — Radźkoŭ, Ivanoŭ, Jermakova, Snapkoŭ, Vaščanka, Kaciarynič, Čakanaŭ, Čorny, Kraŭcoŭ, Rudnik i Jarmošyna.

BDU ŭ lidarach

Dvanaccać čałaviek skončyli hałoŭny ŭniviersitet krainy — BDU. Varta źviarnuć uvahu, što bolšaść abrali jurydyčny fakultet (Mikłaševič, Sukała, Mickievič, Kaniuk, Šajeŭ).

Narhas za plačyma siemiarych čałaviek, choć čatyry hady tamu mienavita hetaja VNU lidziravała ŭ śpisie. Piaciora čałaviek skončyli Horackuju sielskahahaspadarčuju akademiju, politechničny instytut — čaćviora.

U jakaści druhoha miesca adukacyi Akademiju kiravańnia pry prezidencie abrali 15 čałaviek. Asabliva bahatym byŭ vypusk 2007 hoda, tady dypłom atrymali Kaciarynič, Ščotkina, Rudnik i Ładućka, na hod raniej — Ivanoŭ i Charkaviec.

Źviartaje ŭvahu, što ministr enierhietyki Uładzimir Patupčyk skončyŭ Akademiju kiravańnia pry prezidencie Rasijskaj fiederacyi.

Vyšejšyja kursy KDB za plačyma Anatola Tozika, Valeryja Vakulčyka i Alaksandra Špileŭskaha.

Najpaźniej za ŭsich vyšejšuju adukacyju atrymaŭ vice-premjer Kalinin — až u 34 hady.

«Siarednija» čynoŭniki — Valancin Čakanaŭ i Dźmitryj Kaciarynič

Žančyn siarod navyjšejšaha čynavienstva vobmal, usiaho try (5%). Heta Marjana Ščotkina, Nadzieja Jermakova i Lidzija Jarmošyna.

Takim čynam, siaredni biełaruski čynoŭnik — heta mužčyna 56 hadoŭ z Mahiloŭskaj vobłaści, jaki skončyŭ BDU ci narhas, a paśla zamacavaŭ viedy ŭ Akademii kiravańnia.

Hetamu apisańniu adpaviadajuć ministr handlu Čakanaŭ i ministr pramysłovaści Kaciarynič.