Viečaram 8 śniežnia ŭ «Minsk-Arenie» papularny ŭkrainski hurt «Okiean Jelzi» daŭ trochhadzinny kancert. Jon vychodziŭ na bis čatyry razy.
Lidar hurtu Śviatasłaŭ Vakarčuk paśla pieršaj pieśni spytaŭsia, ci razumiejuć jaho pa-ŭkrainsku. Pačuŭšy śćviardžalny adkaz, muzykant razmaŭlaŭ z publikaj na rodnaj movie.
Kazaŭ jon niašmat, u asnoŭnym dziakavaŭ minčanam i ŭsim biełarusam za padtrymku i luboŭ. Słovy «Dziakuj, Minsk!» Śviatasłaŭ paŭtaraŭ paśla kožnaj pieśni.
Kali muzykanty pačali ihrać pieršyja akordy papularnaj kampazicyi «Biez boju», Vakarčuk uziaŭ u hledačoŭ vialiki ŭkrainski ściah i śpiavaŭ ź im na šyi. Pierad pieśniaj «Usio budie dobrie» jon źviarnuŭsia da hledačoŭ, jakich sabrałasia poŭnaja «Minsk-Arena»:
«Dziakuj za vašu padtrymku! Siońnia jana vielmi patrebna nie tolki našamu hurtu, ale i našaj krainie!»
«Okiean Jelzi» vykanaŭ jak novyja, tak i staryja kampazicyi. Mnohija prychilniki kalektyvu ŭžo viedali słovy piesień z alboma «Ziamla» na pamiać. Padčas kancerta fanaty arhanizavali fłešmob: prynieśli biełyja pavietranyja bałoniki z čyrvonym sercam, u jakim byŭ łahatyp hurtu, i puskali ich u fan-zonie.
