«Tajamnica nočy».
Hieroj uračystaściaŭ — biassprečny kłasik ajčynnaha mastactva. Jaho roskvit pryjšoŭsia na 1960-1980-ja hady minułaha stahodździa, kali byli stvorany «Bałada pra mužnaść», «Majo Paleśsie», «Maciarynskija kryły», «Vieraśnioŭskija tumany», «Pieršy śnieh» i, zrazumieła, «Žnivień», uklučany Siarhiejem Chareŭskim u 100 tvoraŭ mastactva XX stahodździa.
Na vystavie pradstaŭlena 60 prac Vaščanki, stvoranych za apošnija try dziesiacihodździ.
Heta śviedčańnie nadzvyčajnaj pracazdolnaści. Mastak navat u takim pavažanym uzroście štodzień prychodzić u majsterniu.
Na dumku Ryhora Sitnicy, «jaho žyćcio — prykład, jak možna rasparadzicca časam i losam. Vaščanka rasparadziŭsia imi hienijalna».
Istotna, što tvorca praciahvaje raźvivacca i źmianiacca. Jaho karciny vielmi roznyja: naprykład, tvory 1990-ch niepadobnyja na tyja, jakija napisany ŭ «nulavyja».
«Siońniašniaja vystava — plon šmathadovych razvažańniaŭ, naviejanych biassońnicaj i niejkimi žyćciovymi epizodami, — kaža Vaščanka. — A taksama staradaŭnimi pavierjami, lehiendami. Bo noč zaŭsiody zachoŭvaje mnostva tajamnic».
Najbolšaje ŭražańnie pakidajuć try tvory.
«Iardań na Paleśsi» (1989) vyklikaje mižvolnyja asacyjacyi z čarnobylskaj trahiedyjaj: palešuki źbirajucca chryścić zaradžanuju radyjacyjaj vadu (sam Vaščanka naradziŭsia ŭ vioscy Brahinskaha rajona).
«Dvoje» (2001) stvarajuć adčuvańnie raskołataha śvietu, uratavacca ŭ jakim možna tolki praz kachańnie.
«Žar kupalskaha vohnišča» (1999-2003) pieradaje atmaśfieru kvitnieńnia pryrody, jakaja litaralna dychaje žarściu.
Adnu ź interpretacyj tvorčaści Vaščanki prapanavaŭ Hienadź Buraŭkin. Jon doŭha nie moh uśviadomić, čamu pracy Vaščanki nibyta źjaŭlajucca zmročnymi (naprykład, tak mastak adlustroŭvaje nieba). U niejki momant Buraŭkin zrazumieŭ, što dla Vaščanki nieba — heta ziamla. Jon uzdymaje biełaruskuju ziamlu da vyšyni nieba.
