Biełaruś hatova na lubyja zachady dla narmalizacyi adnosinaŭ ź Jeŭrasajuzam. Pra heta zajaviŭ siońnia Alaksandr Łukašenka, prymajučy davierčyja hramaty pasłoŭ zamiežnych dziaržaŭ, pieradaje BiełTA.
Pry hetym jon padkreśliŭ, što «da nas nie moža być nijakich pretenzij u płanie narmalizacyi hetych adnosin».
«Ja nie chaču skazać, što miač na vašym baku — heta žurnaliscki štamp. Ale jon sapraŭdy na vašym baku».
«My ščyra zacikaŭleny ŭ raźvićci dobrasusiedskich adnosin ź Jeŭrapiejskim sajuzam. Heta abumoŭlena nie tolki hieahrafičnaj, histaryčnaj, kulturnaj blizkaściu, ale i nieabchodnaściu pryniaćcia sumiesnych zachadaŭ reahavańnia na rehijanalnyja vykliki i pahrozy», — dadaŭ Łukašenka.
Jon zajaviŭ, što plonnaja praca pa hetych i inšych napramkach mahčymaja vyklučna na asnovie raŭnapraŭja i ŭzajemnaj pavahi.
«U nas zanadta šmat źniešnich pahroz. Davajcie razam padumajem, jak supraćstajać im, a nie skosa hladzieć adzin na adnaho. Heta ni ŭ vašych intaresach, ni ŭ našych», — skazaŭ Łukašenka.
Pavodle jaho słoŭ, prahmatyčny padychod i nacelenaść na pazityŭny vynik dazvolać bakam dasiahnuć mnohaha ŭ samych roznych śfierach. Heta, adznačyŭ Łukašenka, u roŭnaj stupieni stavicca jak da ŭzajemadziejańnia ź Jeŭrasajuzam u cełym, tak i da dvuchbakovych adnosin z Francyjaj, Niderłandami, Ispanijaj i Słavienijaj, čyje pasły ŭručyli siońnia davierčyja hramaty.
Jak viadoma, pradstaŭniki ES na roznych uzroŭniach nieadnarazova zajaŭlali, što dyjałoh pamiž Minskam mahčymy tolki paśla vyzvaleńnia i reabilitacyi palitviaźniaŭ.