Vybary va Ŭkrainie na pieršy pohlad ujaŭlalisia rucinnaj praceduraj, čarhovym aktam u specyfičnaj “kamedyi del'arte”, jakoj padajecca zvonku palityčnaja baraćba ŭ krainie nad Dniaprom, ź jaje svojeasablivymi niepisanymi praviłami. Adnak vynik hetych vybaraŭ znoŭ maje vialikaje značeńnie dla našaj susiedki, a taksama Biełarusi i ŭsiaho rehijonu.
Nasupierak spadziavańniam vorahaŭ i aściaroham siabroŭ, vybary dakazali, što Aranžavaja revalucyja nie była vypadkam, adzinkavym uzdymam zhalełych masaŭ i nacyjanalnaj intelihiencyi, ale była plonam hłybinnaha pracesu. Va Ŭkrainie jość stałaje zapatrabavańnie na ŭkrainskamoŭnych, praeŭrapiejskich lideraŭ, ludzi hałasujuć za ich, navat razumiejučy ich słabaści i zahany, pakul na hetaje, postsavieckaje pakaleńnie, niama lepšaje źmieny.
Dla Biełarusi bolš efektyŭny ŭrad u Kijevie stanie lepšym partneram u enerhietycy. Krainy dahetul nie sfarmavali tranzytnaha sajuzu. Miž tym u kaaperacyi ź Litvoj i, šyrej, Bałtyjaj, Skandynavijaj i Polščaj, jany mohuć utvaryć efektyŭny rehijanalny chaŭrus.
Rasieja tak i nie zmahła adnavić svoj upłyŭ va Ŭkrainie, jak i ŭ Małdovie i Hruzii. Heta taksama zapomniać biełaruskija palityki.
* * *
Pierakanaŭčaha pośpiechu na daterminovych parlamenckich vybarach va Ŭkrainie dasiahnuŭ blok Julii Cimašenki.
Vyniki daterminovych parlamenckich vybaraŭ va Ŭkrainie ŭ značnaj stupieni akazalisia sensacyjnymi. Partyi, jakija ŭznačalvajuć Julija Cimašenka i Viktar Juščanka, dasiahnuli našmat lepšaha vyniku, čym na papiarednich vybarach, i navat čym pradkazvali sacyjolahi na pieršych etapach kampanii.
Adstavańnie Bloku Cimašenki ad Partyi rehijonaŭ skaraciłasia ŭ paraŭnańni ź minułymi vybarami z 11 da 3,5 %.
Razam partyi Cimašenki i Juščanki atrymajuć 228 mandataŭ u novaj Radzie. U papiaredniaj jany mieli paśla vybaraŭ 208, pryčym za čas isnavańnia Rady Janukovič pierakupiŭ 30 dziasiatki deputataŭ ź ichnych šerahaŭ.
Partyja rehijonaŭ i kampartyja, što abapirajucca na rasiejskamoŭnaje nasielnictva ŭschodu Ŭkrainy, buduć mieć u novaj Radzie 202 mandaty.
Jašče 20 miescaŭ zojmuć pradstaŭniki drobnaj centrysckaj hrupoŭki biez vyraznaj idealahičnaj pazycyi.
Vyniki vybaraŭ z roźnicaj da 0,1—0,4 % supali z dadzienymi čatyroch praviedzienych ekzyt-połaŭ. Naziralniki taksama aceńvajuć mahčymaść falšavańnia vybaraŭ va Ŭkrainie ŭ 1 %. Vybarčy praces tam prazrysty, u skład kamisij uvachodziać pradstaŭniki ŭsich palityčnych siłaŭ, daterminovaje hałasavańnie abmiežavanaje 0,5 % ad vybarcaŭ, a naziralniki majuć mahčymaść sačyć za ŭsimi etapami padliku hałasoŭ. U hetym adroźnieńnie ŭkrainskaj vybarčaj pracedury ad biełaruskaj.
Paśla padliku 99,9 % biuleteniaŭ, Partyja rehijonaŭ Viktara Janukoviča maje 34,3 %. U śpinu joj dychajuć cimašenkaŭcy z 30,7%. Zatym – “Naša Ŭkraina” (14,2 %). U Kamunistyčnaj partyi 5,4 %. Blok Litvina atrymaŭ 4 %.
Na biełaruskich vybarčych učastkach najbolšuju kolkaść hałasoŭ nabrała Partyja rehijonaŭ.
Julija Cimašenka spadziajecca sfarmavać urad. Na toje samaje raźličvaje i Viktar Janukovič. Prezydent Juščanka ŭ sieradu źviarnuŭ zaklik da farmavańnia ŭradavaj kaalicyi da ŭsich troch asnoŭnych palityčnych siłaŭ, što moža być znakam taho, što jon chacieŭ by ŭtvareńnia šyrokaj kaalicyi, jakaja b zadavalniała i ŭschod, i centar krainy.
Ju. Cimašenka ŭ adkaz zajaviła, što nia ŭvojdzie ŭ adnu kaalicyju z Partyjaj rehijonaŭ.
Mikoła Buhaj
