Biełaruś, Rasija i Ukraina stracili prava na aŭtamatyčny vychad u finał "Jeŭrabačańnia-2008", jaki projdzie ŭ stalicy Sierbii Białhradzie. Paviedamleńnie ab hetym raspaŭsiudziła pres-słužba Nacyjanalnaj dziaržaŭnaj teleradyjokampanii Respubliki Biełaruś.
U im havorycca, što na 50-j štohadovaj sustrečy ŭ italjanskaj Vieronie Televizijny kamitet JEVS pryniaŭ prapanovu Arhkamiteta konkursu pieśni "Jeŭrabačańnie" ab źmianieńni farmatu praviadzieńnia konkursu.
Z 2008 hoda ŭsie krainy-ŭdzielnicy buduć raździeleny na 2 paŭfinalnyja hrupy. Aŭtamatyčnymi finalistami zastajucca Vialikabrytanija, Hiermanija, Ispanija i Francyja jak krainy - zasnavalnicy konkursu "Jeŭrabačańnie", a taksama Sierbija jak kraina - pieramožca "Jeŭrabačańnia-2007". Takim čynam, heta rašeńnie Televizijnaha kamiteta JEVS pazbaŭlaje ŭ tym liku Ukrainu, Rasiju i Biełaruś, jakija zaniali ŭ hetym hodzie 2-je, 3-je i 6-je miescy adpaviedna, prava aŭtamatyčnaha ŭdziełu ŭ finale "Jeŭrabačańnia-2008".
