Fota z fejsbuka Volhi Karač.
Fota z fejsbuka Volhi Karač.
«U mianie naradziŭsia syn Śviatasłaŭ. Žyvie Biełaruś!» — taki zapis siońnia, 24 śniežnia, pakinuła ŭ Fejsbuku kiraŭnica kampanii «Naš dom» Volha Karač. «Naša Niva» pahutaryła sa ščaślivaj maci.
Jak vyśvietliłasia, Śviatasłaŭ naradziŭsia jašče try tydni nazad, 3 śniežnia. Prosta mama z tatam vyrašyli tady nie afišavać padzieju. Chaciełasia bolš času addavać siamji, «naładzić pamiž saboj kamunikacyju», — tłumačyć Volha.
Syn naradziŭsia va Ukrainie padčas Jeŭramajdanu. Na Majdan palityk jechała admysłova. A z rodami «tak užo zdaryłasia», kaža žančyna.
Syna nazvali ŭ honar staražytnaha kniazia Śviatasłava Iharaviča. Jamu dali dvajnoje proźvišča, pry hetym spačatku idzie žončyna — Karač-Barščeŭski. «Heta było naša ahulnaje rašeńnie», — zapeŭniła Volha.
Ciapier jana z mužam i svaimi baćkami znachodziacca va Ukrainie. Na radzimu ŭ Viciebsk źbirajucca adrazu paśla Novaha hoda. Treba, kab synula krychu adužaŭ. Jon važyć 3 150.
Doma ŭnuka ź nieciarpieńniem čakajuć jašče adny dziadula z babulaj, baćki Aleha. Dla Volžynych heta druhi ŭnuk, a dla mužavych — pieršy, doŭhačakany.
My zapytali, ci nie paŭpłyvaje źjaŭleńnie novaha člena siamji na palityčnyja płany. Nahadajem, palityk zajaŭlała pra ŭdzieł u prezidenckich vybarach u 2015-m hodzie.
«Zrazumieła, što nie! Ja vielmi spadziajusia, što jakraz budu bolš razumieć maładych baćkoŭ i ludziej, u jakich jość dzieci. Bo raniej dla mianie heta było bolš tearetyčna».
Naadvarot, Volha ličyć, što ź dziciom zajmieje bolš pośpiechu, bo žyćcio stanie paŭniejšym: «Ja zaraz zrazumieła, što žyćcio było nie poŭnaje. Jano było narmalnaje. U peŭnym sensie, ščaślivaje. Ale nie poŭnaje».
Volzie 34 hady. U raniejšych intervju jana kazała, što była ciažarnaja, ale dzicia pamierła.
«Viedajecie, atrymałasia, što my niekalki hadoŭ maralna rychtavalisia heta ŭsio paŭtarać. Nie daj boh heta ŭsio adčuvać, kali ŭ ciabie ŭnutry miortvaje dzicia… Heta prosta piekła».
Na pytańnie, ci daviałosia hetym razam źviarnucca da peŭnych miedycynskich technałohij, kab ažyćciavić maru, Volha adkazała tak: «Usio zrabiŭ Boh. Tak što dziakuj Bohu, usio ŭdałosia».
«Naša Niva» vinšuje Volhu Karač i Aleha Barščeŭskaha z naradžeńniem syna i zyčyć siamji najlepšaha.
