Dva z pałovaj hoda paśla trahiedyi, jakaja zdaryłasia z žycharom Homiela Alaksandram Klimavym, jon chodzić pa instancyjach, kab dakazać, zdavałasia b, vidavočnaje: jon atrymaŭ ciažkuju traŭmu na vytvorčaści, u pracoŭny čas. Addaŭšy 32 hady žyćcia rodnamu pradpryjemstvu — AAT «Homielski chimičny zavod», uzamien čałaviek atrymaŭ zvalnieńnie i «Akt ab nievytvorčaj traŭmie».
Pracavaŭ Alaksandr Klimaŭ aparatčykam abpału šostaha razradu, na zavod pryjšoŭ u 1978 hodzie, tak i zastaŭsia tut da 2012 hoda. Paśla praciahłaha balničnaha byŭ zvolnieny z farmuloŭkaj «u suviazi ź nieadpaviednaściu rabotnika pracy, što vykonvajecca, z pryčyny stanu zdaroŭja, jaki pieraškadžaje pracy».
Klimaŭ dakazvaje, što invalidnaść treciaj hrupy jon «nažyŭ» na rodnym zavodzie. A pradpryjemstva kateharyčna admaŭlaje: maŭlaŭ, traŭma była nievytvorčaja.
Viasnoj 2011 hoda, znachodziačysia na pracoŭnym miescy ŭ pracoŭny čas, Alaksandr Klimaŭ zajšoŭ na estakadu razhruzki vadkaj siery, straciŭ prytomnaść i ŭpaŭ. Pa słovach byłoha pracaŭnika zavoda, pierad padzieńniem jon adčuŭ pach sieravadarodu, zatym — udušša, pasprabavaŭ syści z zony zahazavanaści i aprytomnieŭ ŭžo ŭnizie, kala leśvicy.
Atrymaŭ spałučanuju traŭmu: pierałomy rebraŭ, paško-džańnie ŭłonnaha sučlanieńnia, traŭmatyčny simfizit. Zatym bolš za 200 dzion byŭ na balničnym.
Paśla padzieńnia aparatčyka dastavili ŭ miedpunkt chimzavoda i tolki praź dźvie z pałovaj hadziny jaho narešcie advieźli ŭ Homielskuju abłasnuju tubierkuloznuju balnicu (mienavita tudy viazuć z paškodžańniami lohkich, złamanymi rebrami).
Tubierkuloznaja balnica ŭ zaklučeńni napisała, što «da-dzienyja traŭmy nie adnosiacca da katehoryi ciažkich». Takoje zaklučeńnie daktaroŭ dazvoliła kiraŭnictvu chimzavoda pa fakcie niaščasnaha vypadku na vytvorčaści skłaści akt «ab nievytvorčym niaščasnym vypadku». Zaŭvažym, što kab traŭmy byli pryznanyja ciažkimi, to z abstavinami ich atrymańnia raźbirałasia b nie kiraŭnictva zavoda, a inšyja kampietentnyja orhany.
Na chimzavodzie ŭ akcie napisali, što traŭmu aparatčyk atrymaŭ «z pryčyny chvaravitaha stanu».
Padstavaj dla takoha zaklučeńnia (vyniesienaha lačebna-prafiłaktyčnym učastkam) pasłužyŭ toj fakt, što Alaksandr Klimaŭ raniej źviartaŭsia ŭ kardyjałahičny dyspansier z vysokim ciskam. Lačebny ŭčastak robić vysnovu, što čałaviek moh stracić prytomnaść z-za cisku, a nie atručvańnia hazam.
«Ja ŭ tym kardyjałahičnym dyspansiery navat na ŭliku nie stajaŭ! Jak možna tady rabić vysnovu, što ja moh stracić prytomnaść ad cisku? Tym bolš, maja praca na chimzavodzie była źviazana z asablivymi ŭmovami pracy, ja štohod prachodziŭ miedycynskaje abśledavańnie. Kali b u mianie było niejkaje parušeńnie zdaroŭja, to mianie nie pavinny byli b dapuskać da pracy! A mianie jašče abvinavacili, što, maŭlaŭ, ja schavaŭ svajo zachvorvańnie!» — raschvalavana kaža Klimaŭ.
Jon atrymaŭ invalidnaść 3 hrupy, a rodnaje pradpryjemstva admoviłasia ŭziać jaho na pracu nu choć vachcioram, choć kim. «Źviartaŭsia ja nakont pracaŭładkavańnia ŭ Kamitet pa pracy, zaniataści i sacyjalnaj abaronie, a tam kažuć: vy ž pracavali na chimzavodzie 30 hadoŭ, tudy i źviartajciesia. Mianie śpisali prosta, vykinuli na vulicu», — z horyčču kaža mužčyna.
Jon vajavaŭ suprać «akta ab nievytvorčaj traŭmie» na ŭsich uzroŭniach.
Letam 2013 hoda Departamient inśpiekcyi achovy pracy narešcie vynies pastanovu, što akt, składzieny ab nievytvorčaj traŭmie, nie maje siły. Departamient daŭ daručeńnie chimzavodu pravieści novaje rasśledavańnie vypadku. AAT «Homielski chimičny zavod» pasłuchaŭsia Departamient achovy pracy i skłaŭ novy akt. Ale tam iznoŭ napisaŭ: «traŭma — nievytvorčaja».
Ciapier u sudzie Navabielickaha rajona Homiela pačalisia słuchańni pa skarzie Alaksandra Klimava. Adkazčykam vystupaje Homielskaja abłasnaja tubierkuloznaja balnica — «ludzi ŭ biełych chałatach», jakija pryznali, što traŭma — niaciažkaja. Pradstaŭlaje intaresy zajaŭnika pravavy inśpiektar prafsajuza REP pa Homielskaj vobłaści Leanid Sudalenka.
«Stratehičnaj metaj my pastavili pryznać vypadak, jaki adbyŭsia, vytvorčaj traŭmaj, što dazvolić Klimavu atrymlivać štomiesiac strachavyja vypłaty», — prakamientavaŭ Sudalenka.
«Užo prajšło adno pasiadžeńnie, balnica nie žadaje pryznavać ciažkuju stupień traŭmy. My budziem damahacca praviadzieńnia sudova-miedycynskaj ekśpiertyzy, bo traŭma, a mienavita razryŭ ułonnaha sučlanieńnia tazaściohnavaj kostki, a hety dyjahnaz pastaviła navat abłasnoje ŭpraŭleńnie achovy zdaroŭja, daje padstavy adnieści traŭmu da ciažkaj», — dadaje pravavy inśpiektar.
Kali Klimaŭ dakaža ŭ sudzie, što traŭma ciažkaja, tady i budzie akt formy N-1 ab niaščasnym vypadku na vytvorčaści.
«Mała chto zmahajecca za svaju pracu tak nastojliva, jak Klimaŭ», — padkreśliŭ Leanid Sudalenka.
Alaksandr Klimaŭ spadziajecca niedzie ŭsie-taki znajści spraviadlivaść u hetym śviecie, u hetaj krainie, u hetym sudzie…
