U Nacyjanalnaj biblijatecy Biełarusi 26 śniežnia staršynia praŭleńnia AAT «Bank BiełZEB» Pavieł Kałaur i namieśnik dyrektara Nacyjanalnaj biblijateki pa navukovaj rabocie i vydavieckaj dziejnaści Alaksandr Suša padpisali ŭ druk pieršy tom poŭnaha zboru knih Francyska Skaryny.
Heta cyrymonija aznamienavała pačatak ahulnanacyjanalnaha prajekta pa padrychtoŭcy i vypusku pieršaha faksimilnaha vydańnia poŭnaha zboru knih biełaruskaha i ŭschodniejeŭrapiejskaha pieršadrukara. Prajekt prymierkavany da 500-hodździa vydańnia Francyskam Skarynam pieršaj knihi dla ŭschodnich słavian, jakoje budzie adznačacca 6 žniŭnia 2017 hoda.
Inicyjatarami i asnoŭnymi vykanaŭcami prajekta stali AAT «Bank BiełZEB», jakoje, budučy sacyjalna adkaznaj ustanovaj, zacikaŭlena ŭ padtrymcy raźvićcia nacyjanalnaj kultury, i Nacyjanalnaja biblijateka Biełarusi, što źjaŭlajecca hałoŭnaj navukovaj ustanovaj u halinie zachavańnia, vyvučeńnia i papularyzacyi knižnaj spadčyny krainy.
Usie raboty vykonvajucca ŭ ramkach realizacyi dziaržprahramy «Kultura Biełarusi» na 2011-2015 hady.
Realizacyja prajekta raźličana na piać hadoŭ (2013-2017 hady) zychodziačy z abjomu rabot pa atrymańni ličbavych kopij aryhinalnych vydańniaŭ Francyska Skaryny, padrychtoŭcy i druku faksimilnych vydańniaŭ, navukovym supravadžeńni.
Za hety pieryjad płanujecca vypuścić faksimilnaje vydańnie 25 knih u 20 tamach, nadrukavanych Skarynam u Prazie i Vilni. Asnovu składuć elektronnyja kopii zachavanych knih pieršadrukara, što znachodziacca ŭ biblijatekach i muziejach Biełarusi, Rasii, Ukrainy, Hiermanii i inšych krain. Faksimilnaje vydańnie z maksimalnaj paŭnatoj zanatuje knihi Francyska Skaryny. U ich buduć zachavany struktura, źmiest, asablivaści šryftoŭ i hraviur aryhinalnych vydańniaŭ, pieradadzieny ŭsie štrychi, nabytyja na praciahu 500-hadovaha isnavańnia.
U hod płanujecca vypuskać ad 2 da 5-7 knih nakładam kožnaja 1 tys. ekzemplaraŭ.
