Pra heta ŭ svaim Fejsbuku napisała aktyvistka Abjadnanaj hramadzianskaj partyi (AHP) Aksana Kryščanovič.
Lidara AHP zatrymali ranicaj kala haraža, jon źbiraŭsia jechać u ofis partyi, što znachodzicca kala Kamaroŭki.
Nahadajem, što raniej Labiedźka zajaŭlaŭ, što budzie siońnia, 12 studzienia, a 12-j praciahvać zbor podpisaŭ u centry horada, na płoščy Jakuba Kołasa, za adstaŭku ŭrada i za admienu pošliny na dopusk aŭto da ruchu.
«Ja hatovy dapamahčy ŭ spravie samaarhanizacyi tym, kaho ciapierašniaja sistema i palityka nie prosta dastali (takich u krainie bolšaść), a chto hatovy realna niešta rabić, a nie tolki skuholić i skardzicca samomu sabie na kuchni», — napisaŭ 9 studzienia A. Labiedźka ŭ svaim Fejsbuku.
Darečy, pa zakonie zbor podpisaŭ nie patrabuje niejkich uzhadnieńniaŭ i atrymańnia dazvołaŭ va ŭładaŭ.
Pierad 16:00 Anatol Labiedźka na svajoj staroncy ŭ fb paviedamiŭ, što znachodzicca ŭ milicyi.
«Ja ŭ apornym», — napisaŭ jon. «Ja ŭ Saviet [vidać, adździaleńnie milicyi ŭ Savieckim rajonie] Nu i voń tut Aporny», — dadaŭ jon u nastupnym dopisie.
Jon paśla paviedamiŭ, što znachodzicca ŭ apornym punkcie milicyi Savieckaha rajona Minska, što pa zav. Jakuba Kołasa, 15, korp. 2. Za praviadzieńnie 5 studzienia ŭ Minsku zboru podpisaŭ za admienu aŭtapošliny na jaho składzieny pratakoł na padstavie p. 3 artykuła 23.34 Kodeksa ab administracyjnych pravaparušeńniach (Parušeńnie paradku arhanizacyi ci praviadzieńnia masavych mierapryjemstvaŭ). Sankcyi hetaha artykuła ciahnuć nakładańnie štrafu ad dvaccaci da piacidziesiaci bazavych vieličyń ci administracyjny aryšt, paviedamlaje BiełaPAN.
Labiedźka taksama skazaŭ, što sud nad im pryznačany na 15 studzienia ŭ sudzie Savieckaha rajona.
***
Nahadajem, lidar AHP byŭ zatrymany ŭ Minsku siońnia ranicaj. Jon vyjšaŭ z doma i nakiravaŭsia ŭ haražny kaapieratyŭ pa mašynu, paśla čaho razdaŭsia zvanok pa damafonie i mužčynski hołas paviedamiŭ žoncy Labiedźki pra jaho zatrymańnie. Dzie ciapier znachodzicca palityk, nieviadoma. Jaho telefon nie adklučany, ale na zvanki jon nie adkazvaje.
Ciońnia ŭ 12 hadzin kala staličnaha Kamaroŭskaha rynku Labiedźka mieŭ namier znoŭ źbirać podpisy ŭ padtrymku admieny aŭtapošliny i adstaŭki ŭrada. Tydzień tamu Labiedźka, a taksama sustaršynia kampanii «Za spraviadlivyja vybary» Viktar Karniajenka taksama kala Kamaroŭskaha rynku źbirali podpisy. Pry hetym za ich dziejańniami nazirała biesprecedentnaja kolkaść supracoŭnikaŭ milicyi i śpiecsłužbaŭ, jakija, adnak, nie pieraškadžali padziejam.
