Viaduć kursy Alesia Litvinoŭskaja i Hleb Łabadzienka.
Siarod udzielnikaŭ byli i staryja, i maładyja.
Razynkaj zaniatkaŭ była skajp-hutarka z pasłom Stefanam Eryksanam.
Siarod udzielnikaŭ byli i staryja, i maładyja.
Zała nabiłasia paŭniutkaja, nie było čym dychać.
Siarod haściej byli i tyja, chto biełaruskuju movu viedaje ŭ daskanałaści. Moža być, nie varta zajmać miesca tych, chto jaje vučyć?
Siarod haściej byŭ paet Siarhiej Paniźnik (u centry).
Arhanizatary kursaŭ «Mova nanova» Hleb Łabadzienka i Alesia Litvinoŭskaja nie čakali takoha anšłahu i razdrukavali ŭsiaho 150 papier z moŭnymi zadańniami. Miž tym, pa samych ścipłych padlikach, u halerei «Ŭ» sabrałasia bolš za 300 čałaviek.
Tamu słuchać zaniatki było nie nadta kamfortna: u zale było zadušna, bolš za pałovu prysutnych słuchali viadučych stojačy.
Napačatku Łabadzienka i Litvinoŭskaja ŭ žartoŭnym dyjałohu vykazali svaju viersiju kanfliktu pamiž dźviuma moŭnymi kursami: «Mova nanova» i «Mova ci kava».
Pa viersii Łabadzienki, Kaciaryna Kibalčyč skazała, što pieradaje viadučym kursy «Mova ci kava» z adzinaj umovaj: źmianić nazvu. Hleb i Alesia vybrali datu i čas praviadzieńnia. A praź niekalki dzion daviedalisia, što Kibalčyč pryznačyła svaje kursy ŭ hetym ža miescy (halereja «Ŭ») i ŭ hety čas (13 studzienia a 19-j). Łabadzienka źviarnuŭsia da kiraŭnictva halerei, jakoje zrabiła vybar na karyść kursaŭ «Mova nanova», jakija zabraniravali miesca pieršymi.
«Za toje, što adbyvajecca paralelna z nami, my nijakaj adkaznaści nie niasiom», – dadaŭ Łabadzienka.
Partniorami novaha prajekta stali hramadskaja kampanija «Budźma biełarusami» i kanał «Biełsat». Svaje vinšavańni praź videa pieradaŭ Ryhor Baradulin.
Adnoj z «razynak» pieršaha zaniatku stała prezientacyja sajta «Movy nanova».
Ich centralnaja častka – vykładzienyja materyjały dla zaniatkaŭ. Arhanizatary zrabili dastupnymi materyjały 20 urokaŭ (u tym liku «Vandroŭki», «Biełaruskija stravy», «Śviaty», «Architektura», «Muzyka», «Sport», «Adpačynak», «Častki cieła», «Lecišča», «Čytańnie», «Łacinka», «Nadvorje», «Adzieńnie», «Posud», «Kalandar»). Taksama na sajcie vykładzieny biełaruskija narodnyja imiony, cikavostki, skanavany ŭryvak z treciaha statuta VKŁ. Jość raździeły videa, hramatyka leksika, kultura movy.
Viadučyja pracavali ŭ duecie i na kantraście.
Alesia Litvinoŭskaja ŭvasablała akademičny styl. Naprykład, jana papularna patłumačyła ŭdzielnikam, jak utvarajecca forma zahadnaha ładu i elehantna źviazała jaje z nazvaj adnaho z partnioraŭ – kampanii «Budźma». Łabadzienka pracavaŭ u zvykłym farmacie šoŭmena, jaki dazvalaŭ sabie narodnyja žarty «raniej jajki byli lepšyja» abo «mierylisia karavajami».
Padčas sustrečy adbyłasia hutarka z dvuma haściami. Biełaruskamoŭny piekar ź Vierchniadźvinska Kastuś Łarkoŭ, jaki, darečy, učora pieradaŭ u «Našu Nivu» vypiečany im karavaj, zrabiŭ padobny padarunak i naviedvalnikam kursaŭ.
Karavaj puścili pa aŭdytoryi, tamu pakaštavać jaho zmoh kožny.
A paśla była arhanizana hutarka praz skajp sa Stefanam Eryksanam, byłym pasłom Šviecyi ŭ Biełarusi.
Eryksan u čarhovy raz prademanstravaŭ prysutnym svaju cudoŭnuju biełaruskuju movu. A Alesia Litvinoŭskaja ŭzhadała, jak vučyła movie spadara Stefana i Džordža Kroła, kolišniaha pasła ZŠA ŭ Biełarusi. Na adnym z pryjomaŭ tyja sustrelisia i pačali razmaŭlać pamiž saboj pa-biełarusku. Pryčym, pieryjadyčna zapytvajučy ŭ Litvinoŭskaj, ci nie robiać jany pamyłak.
Śpiecyjalna da adkryćcia kursaŭ «Mova nanova» Ryhor Baradulin napisaŭ vierš.
NANOVA!
Nieminuča,
Hajuča
Nanova
Raskryvajecca ščyraje słova.
Mova maci —
Krynica śviataja —
Da vytokaŭ
Namiery viartaje.
Jak vysokija mroi,
Abłoki
Dumki nieba
Ratujuć ad śpioki.
My na hetym śviecie
Pavinny
Hadavać movu
Rodnaj Ajčyny.
13 studzienia 2014
Pieršy zaniatak kursaŭ «Mova nanova» možna pryznać udałym. Ale dzie źmiaščać takuju hurmu achvotnych? Voś heta sapraŭdnaja prablema.
Druhi pa liku adbudziecca ŭ nastupny paniadziełak a 19-j u halerei «Ŭ».
