My, vypuskniki EHU, nadzvyčaj zaniepakojenyja toj niaprostaj situacyjaj, jakaja skłałasia ŭ našym univiersitecie.
Pierš za ŭsio my chočam vykazać ščyruju padziaku ŭsim supracoŭnikam univiersiteta, jakija pracavali nad prajektam EHU ŭ Minsku i jakija paźniej zdoleli paśpiachova adradzić univiersitet u Vilni.
Siońnia EHU znoŭ znachodzicca ŭ stanie transfarmacyi, što vyklikana nieabchodnaściu adpaviadać sučasnym litoŭskim i mižnarodnym standartam adukacyi. U ŚMI źjaviłasia niamała paviedamleńniaŭ, jakija śviedčać pra isnavańnie supraćstajańnia ŭnutry ŭniviersiteta. Administracyja prykładaje namahańni pa aptymizacyi mieniedžmientu, kadravaj palityki i biudžetu navučalnaj ustanovy. U hety ž čas istotnaja častka vykładčykaŭ zajaŭlaje pra svaju adłučanaść ad pracesu pryniaćcia rašeńniaŭ va ŭniviersitecie.
Na žal, dyskusija adnosna taho, jakoj maje być budučynia EHU, prymaje niebiaśpiečnuju formu. Heta, u svaju čarhu, niehatyŭnym čynam adbivajecca na navučalnym pracesie, imidžy ŭniviersiteta i vynikach ustupnaj kampanii. Nam baluča nazirać, jak unikalny adukacyjny prajekt niasłavić svaju reputacyju.
My asobna źviartajem uvahu na toje, što ŭ apošnija hady va ŭniviersitecie sfarmavaŭsia sapraŭdy ŭnikalny piedahahičny asiarodak. Heta vykładčyki vysokaha ŭzroŭniu, jakija prapanavali nam adroznaje ad aficyjna-dziaržaŭnaha staŭleńnie da adukacyjnaha pracesu i asoby studenta. Dziakujučy im my navučylisia krytyčna myślić, znachodzić tvorčyja padychody i ŭśviedamlać svaju adkaznaść pierad biełaruskim hramadstvam. My daviarajem našym vykładčykam, a taksama spadziajemsia, što ŭ vyniku reformaŭ dla ich buduć stvoranyja ŭsie nieabchodnyja ŭmovy dla piedahahičnaj i navukovaj dziejnaści.
My zaklikajem kiraŭnictva EHU źviarnuć pilnuju ŭvahu na isnavańnie ŭnutranych supiarečnaściaŭ va ŭniviersitecie, a taksama stvaryć bolš spryjalnyja ŭmovy dla taho, kab roznyja hałasy mahli być pačutymi.,
My zaklikajem usie baki kanfliktu admovicca ad pryvatnych ambicyj i kateharyčnych farmulovak. Pamiatajma pra našuju asablivaść. Jeŭrapiejski humanitarny ŭniviersitet zaŭždy hodna pieraadolvaŭ vyprabavańni; u značnaj stupieni dziakujučy tamu, što nas abjadnoŭvała ahulnaja «ideja Univiersiteta». Niachaj tak budzie i nadalej.
