U vychodnyja ŭ Biełarusi miescami čakajecca da minus 30 hradusaŭ, Ministerstva pa nadzvyčajnych situacyjach zaklikaje da pavyšanaj aściarožnaści.
Asnoŭnyja niebiaśpieki padčas marazoŭ dla čałavieka — pieraachaładžeńnie arhanizma i abmaražeńnie. U mocnyja marazy taksama mahčymyja avaryi na sistemach žyćciezabieśpiačeńnia, parušeńni ŭ pracy darožna-kamunalnych słužbaŭ, u pracy transpartu. Pavialičvajecca kolkaść pažaraŭ u žyłym siektary.
Asabliva treba bajacca abmaražeńniaŭ — paškodžańniaŭ jakoj-niebudź častki cieła (až da amiarćvieńnia) z-za ŭździejańnia nizkich tempieratur.
Abmaražeńnie, jak praviła, supravadžajecca ahulnym pieraachaładžeńniem i čaściej za ŭsio zakranaje vušy, nos, palcy ruk i noh.
Pryčyny, jakija spryjajuć abmaražeńniu, — ciesnaje i syroje adzieńnie i abutak, fizičnaja stoma, hoład, vymušanaje doŭhaje nieruchomaje stanovišča, papiaredniaja choładavaja traŭma, asłableńnie arhanizma ŭ vyniku pieraniesienych zachvorvańniaŭ, potnyja nohi, chraničnyja zachvorvańni sasudaŭ nižnich kancavin i sardečna-sasudzistaj sistemy.
Pavodle statystyki, ciažkija abmaražeńni, jakija pryviali da amputacyi kaniečnaściaŭ, niaredka adbyvajucca ŭ stanie mocnaha ałkaholnaha apjanieńnia. Pić ałkahol na marozie vielmi niebiaśpiečna. Ałkaholnaje apjanieńnie vyklikaje vialikuju stratu ciapła, pry hetym stvarajučy iluziju kamfortu. Taksama ŭ choład lepš nie kuryć — kureńnie źmianšaje pieryfieryjnuju cyrkulacyju kryvi.
Na marozie varta paźbiahać kantaktu hołaj skury ź mietałam, u tym liku lepš nie nasić mietaličnych (u tym liku załatych, siarebranych) upryhožvańniaŭ — piarścionkaŭ, zavušnic i h.d. Mietał astyvaje značna chutčej za cieła i mahčyma prylipańnie da skury z bolevymi adčuvańniami i chaładovymi traŭmami. Piarścionki na palcach da taho ž abciažarvajuć narmalnuju cyrkulacyju kryvi.
Najbolš schilnyja da pieraachaładžeńnia i abmaražeńnia dzieci i pažyłyja ludzi.
Padčas prahułki ŭ mocny maroz budzie nie lišnim zachapić z saboj paru źmiennych rukavic i termas z haračaj harbataj. Adpuskajučy dziaciej hulać u maroz na vulicy, darosłyja pavinny pamiatać, što jamu treba kožnyja 15-20 chvilin viartacca ŭ ciapło i sahravacca.
U MNS nastojliva rekamiendujuć z usioj adkaznaściu pastavicca da vybaru adzieńnia ŭ takoje nadvorje.
«Treba pamiatać, što ciapło ŭtrymlivaje pavietra. Čym bolš prasłojek pavietra pad adzieńniem, tym lepš. Adnak być zusim jak «kapusta» taksama drenna — heta strymlivaje ruch. Dobryja lubyja «puchnatyja» tkaniny, dzie dobra ŭtrymlivajecca pavietra», — raspaviali ŭ MNS.
Abutak nie pavinien być ciesnym — heta pahoršyć cyrkulacyju kryvi ŭ nahach, jakaja niasie ciapło. Palcy pavinny svabodna ruchacca.
Abutak taksama lepš načyścić tłustym kremam - heta nie daść jamu pramoknuć i zachavaje nohi suchimi.
Praz ruki možna stracić da 17% ciapła, tamu vielmi važna nasić palčatki, a jašče lepš — rukavicy.
Taksama važna mieć šapku i šalik. Tyja ŭčastki skury, jakija zastalisia nie zakrytymi, treba pamazać tłustym kremam.
