Nastaŭniki i daktary ŭ pracoŭny čas padzarablali miašečnikami na miažy. Ab paśpiachovaj apieracyi miascovaha ŭpraŭleńnia KDB piša hazieta «Hrodzienskaja praŭda».
fota vykarystana ŭ jakaści ilustracyi, tutgrodno.com
Akazvajecca, hrodziency pierasiakali miažu ŭ pracoŭny čas, choć pa dakumientach nibyta pracavali na pracoŭnym miescy.
Niestykoŭki zamiežnych pajezdak z tabielami ŭliku pracoŭnaha času vyjaviła UKDB pa Hrodzienskaj vobłaści. Hałoŭnaje ŭpraŭleńnie viedamasnaha kantrolu abłvykankama pravieryła, ci abhruntavana hramadzianie atrymlivali zarobak. «Jak i mierkavałasia, amataram pavandravać naličvalisia hrošy za faktyčna nieadpracavany čas. A heta značyć, naniesieny materyjalny ŭron dziaržavie», — piša hazieta.
Siarod parušalnikaŭ pracoŭnaj dyscypliny — daktary, nastaŭniki, rabotniki dziciačych sadoŭ i ich svajaki.
«Za šeść apošnich hadoŭ try zahadčyki i try namieśniki zahadčycy hrodzienskimi dziciačymi sadami ahułam bolš za dźvieście razoŭ pierasiekli miažu. Va ŭsich dvuchstach vypadkach jany pavinny byli znachodzicca na pracy i vykonvać svaje słužbovyja abaviazki. Ich adsutnaść na pracoŭnym miescy nijak nie adbiłasia na ich zarpłacie», — paviedamlaje hazieta sa spasyłkaj na Hałoŭnaje ŭpraŭleńnie viedamasnaha kantrolu abłvykankama.
Pakarać parušalnikaŭ nie atrymałasia.
Kiraŭniki prahulščykaŭ paličyli niepatrebnym nakładvać na ich dyscyplinarnyja spahnańni. Słužbovyja asoby pahadzilisia z pretenzijami i dobraachvotna pakryli ŭ biudžet srodki, nieabhruntavana vypłačanyja im u jakaści zarobku i inšych vypłat. Dźvie zahadčycy dziciačymi sadami zvolnilisia pa ŭłasnym žadańni.
