U Bresckaj vobłaści raspačata kryminalnaja sprava pa fakcie kradziažu virtualnaha tanka.
Jak paviedamiŭ viadučy śpiecyjalist adździaleńnia infarmacyi i hramadskich suviaziaŭ UUS Bresckaha abłvykankama Iryna Błachina, sprava na padstavie č. 2 art. 349 KK (niesankcyjanavany dostup da kampjutarnaj infarmacyi) raspačata Pružanskim rajonnym adździełam Śledčaha kamiteta.
Pavodle słoŭ Błachinoj, u orhany ŭnutranych spraŭ źviarnuŭsia 30-hadovy žychar Pružanaŭ.
Jon skazaŭ, što 7 studzienia pryblizna ŭ 2.00 vyjaviŭ, što nie moža trapić u svoj akaŭnt u papularnaj hulni World of Tanks. Pavodle słoŭ paciarpiełaha, u kuplu i madernizacyju svajho tanka IS-8 jon ukłaŭ nie tolki šmat starańniaŭ padčas virtualnych bajoŭ, ale i bolš za 1,2 młn. rubloŭ.
Supracoŭniki adździeła pa raskryćci złačynstvaŭ u śfiery vysokich technałohij UUS Bresckaha abłvykankama źviazalisia z raspracoŭščykami hulni i ŭstanavili, što hety tank praciahvaje «zmahacca». Pry hetym kirujuć im z Maskoŭskaj vobłaści. Akaŭnt vykradalnika byŭ zabłakavany, najbližejšym časam virtualny tank budzie viernuty zakonnamu ŭładalniku.
Supracoŭniki milicyi taksama vyśvietlili, što paciarpieły pahrebavaŭ pytańniami biaśpieki svaich ulikovych źviestak.
Złamyśniku ŭdałosia atrymać dostup da ŭlikovaha hulniavaha zapisu, papiarednie ažyćciaviŭšy niesankcyjanavany dostup da elektronnaj paštovaj skryni žychara Pružan, da jakoj hety ŭlikovy zapis byŭ pryviazany. Parol ad pošty byŭ prostym i składaŭsia z kambinacyi ličbaŭ pa paradku.
Jak adznačyła Błachina, u Bresckaj vobłaści za apošnija dva hady heta ŭžo treci fakt kradziažu virtualnaha tanka. Va ŭsich vypadkach tanki viernuty ŭładalnikam. U pieršych dvuch vypadkach kryminalnyja spravy nie raspačynalisia.
