Ź śniežnia 2013 h. pałata pradstaŭnikoŭ razhladaje inicyjavany Łukašenkam prajekt «Ab uniasieńni źmienaŭ i dapaŭnieńniaŭ u Zakon RB «Ab vajennym stanoviščy».
U vypadku pryniaćcia varyjantu z novymi papraŭkami siłaviki zmohuć prymianiać suprać hramadzian zbroju zusim biespakarana.
Tak, u novaj redakcyi artykuł 18 « Užyvańnie zbroi, bajavoj i śpiecyjalnaj techniki… » hučyć: «Vajskoŭcy i supracoŭniki vajenizavanych arhanizacyj… nie niasuć adkaznaści za škodu, pryčynienuju ŭ suviazi z… užyvańniem (vykarystańniem) zbroi ŭ praduhledžanych hetym Zakonam i inšymi zakanadaŭčymi aktami vypadkach, kali… jon dziejničaŭ va ŭmovach abhruntavanaj prafiesijnaj ryzyki abo krajniaj nieabchodnaści».
«Salidarnaść» pacikaviłasia ŭ ekśpierta, jakija ryzyki dla prostych hramadzian niasie novaja redakcyja zakona i čym vyklikana jaho redahavańnie.
— Prostaje paraŭnańnie raniejšaha teksta i varyjanta z papraŭkami ŭžo havoryć pra mnohaje, — adznačaje kaardynatar kampanii «Za alternatyŭnuju hramadzianskuju słužbu», aktyvist «Havary praŭdu» Michaił Paškievič. — U parłamiencie zakon znachodzicca ad 9 śniežnia 2013 hoda. My natyknulisia na jaho vypadkova, kali šukali prajekt zakona ab alternatyŭnaj hramadzianskaj słužbie. Šmat pra što kaža i toj fakt, što na sajcie pałaty pradstaŭnikoŭ Nacyjanalnaha schodu zakona niama.
Pa słovach ekśpierta, kali dapoŭnieny varyjant zakona ŭchvalać, u vypadku ŭviadzieńnia vajennaha stanovišča siłaviki atrymlivajuć poŭny kart-błanš na lubyja dziejańni.
— Kali ŭličyć, što prajekt byŭ uniesieny ŭ siaredzinie śniežnia i pa inicyjatyvie prezidenta, to anałohii z Ukrainaj u najaŭnaści, — praciahvaje Michaił Paškievič. — U vypadku zaćviardžeńnia papravak biełarusy zrobiacca zakładnikami ŭsieŭładździa siłavikoŭ.
