Pravaachoŭnyja orhany rastłumačyli pryčynu zakryćcia ŭ siaredzinie dnia 26 lutaha, na try hadziny, abiedźviuch linij Minskaha mietrapalitena.
U sumiesnym paviedamleńni KDB Biełarusi i HUUS Minharvykankama ŭkazvajecca, što siońnia dniom da supracoŭnika UUS pa achovie Minskaha mietrapalitena źviarnułasia studentka.
Jana paviedamiła, što jaje ŭvahu pryciahnuŭ tekst SMS adnaho z pasažyraŭ: u im jon paviedamlaŭ pra płany pryvieści ŭ dziejańnie vybuchovaje prystasavańnie ŭ mietro.
Supracoŭnikami HUUS Minharvykankama i UKDB pa Minsku padčas kompleksu apieratyŭna-vyšukovych mierapryjemstvaŭ, u tym liku z prymianieńniem sučasnych techničnych srodkaŭ, asoba hetaha pasažyra była ŭstanoŭlenaja, i chutka jon byŭ zatrymany.
Jak udakładnili ŭ KDB, im akazaŭsia 35-hadovy ŭradženiec Karahandy (Kazachstan), jaki pražyvaje ŭ Minskaj vobłaści.
Zaraz dziejańniam zatrymanaha ŭpraŭleńniem Śledčaha kamiteta Respubliki Biełaruś pa Minsku dajecca pravavaja acenka.
Ustanaŭlivajecca, ci paśpieŭ jon adpravić SMS-paviedamleńnie z pahrozaj ab miniravańni mietrapalitena, pravodziacca nieabchodnyja śledčyja dziejańni.
«Varta zaznačyć, što pravaachoŭnymi orhanami nieadkładna byŭ ažyćcioŭleny ŭvieś nieabchodny kompleks mierapryjemstvaŭ, praduhledžanych ałharytmam dziejańniaŭ u takich situacyjach. U suviazi sa spynieńniem pracy mietro dla zručnaści pasažyraŭ haradskija ŭłady vydzielili dadatkovy hramadski transpart. Praca mietrapalitena była adnoŭlenaja ŭ 17.20», — havorycca ŭ paviedamleńni pravaachoŭnikaŭ.
Nahadajem, infarmacyja pra toje, što ŭ Minsku nie pracujuć abiedźvie linii mietro, stała źjaŭlacca prykładna ŭ 14.45. Na roznych stancyjach pasažyraŭ prasili biez paniki pakinuć mietro i skarystacca naziemnym transpartam. Načalnik mietrapalitena Raścisłaŭ Jurenia paviedamiŭ, što «mietro zakryta na padstavie zahadu milicyi».
Pa telefonie haračaj linii, apublikavanym na sajcie mietrapalitena, zajavili: «Časova prypynieny ruch. Kiraŭnictva raźbirajecca ŭ pryčynach. Paciarpicie».
Pryblizna ŭ 16.00 u HUUS paviedamili, što ŭ mietrapalitenie nijakich nadzvyčajnych zdareńniaŭ niama, «viadziecca adpracoŭka stancyj», praviarajecca infarmacyja ab mahčymym znachodžańni na ich padazronych pradmietaŭ.
U suviazi sa spynieńniem abiedźviuch linij mietro dadatkova na maršruty naziemnaha transpartu było vydzielena 55 aŭtobusaŭ, 48 tralejbusaŭ, šeść tramvajaŭ.
Pa padazreńni ŭ padmannym miniravańni mietro zatrymany žychar Minskaj vobłaści 1979 hoda naradžeńnia.