Hazieta «Kommiersant», spasyłajučysia na krynicy ŭ Dziarždumie, piša, što deputatam budzie prapanavana spraścić nie tolki vydaču rasijskich pašpartoŭ ukraincam, ale i paradak dałučeńnia da Rasii novych subjektaŭ fiederacyi.
Jak udakładniaje vydańnie, ciapier zakon praduhledžvaje, što rašeńnie ab dałučeńni da RF inšaj krainy abo jaje častki ažyćciaŭlajecca «pa ŭzajemnaj zhodzie RF i hetaj zamiežnaj dziaržavy», što paćviardžajecca mižnarodnaj damovaj.
«Hetuju praceduru prapanujecca spraścić tak, što dla dałučeńnia terytoryi budzie dastatkova «volevyjaŭleńnia naroda», naprykład, u formie refierendumu», — piša hazieta. Vydańnie taksama dadaje, što namieśnik staršyni frakcyi spravarosaŭ Michaił Jemialjanaŭ paćvierdziŭ, što taki zakonaprajekt «unosicca ŭ Dumu».
Inicyjatyva rasijskich deputataŭ źjaviłasia na fonie situacyi ŭ Krymie.
Jak abvastryłasia abstanoŭka na Krymskim paŭvostravie
Šerah žycharoŭ respubliki 25 lutaha pačali biesterminovuju akcyju pratestu kala budynka Viarchoŭnaj Rady Kryma, patrabujučy ad deputataŭ nie pryznavać novaha kiraŭnictva krainy, jakoje pryjšło da ŭłady paśla biesparadkaŭ i sutyknieńniaŭ u Kijevie. Akramia taho, pratestoŭcy patrabavali pravieści refierendum, na jakim žychary Kryma abrali b šlach dalejšaha raźvićcia rehijona.
Parłamient Kryma pryznačyŭ na 25 traŭnia refierendum ab pašyreńni paŭnamoctvaŭ aŭtanomii.
Raniej deputat ad partyi ŁDPR Illa Drazdoŭ unios na razhlad u Dziarždumu zakonaprajekt, zhodna ź jakim hramadzianie Ukrainy ruskaj nacyjanalnaści majuć prava na atrymańnie hramadzianstva RF u sproščanym paradku.
Čym adroźnivajecca Krym ad inšych rehijonaŭ Ukrainy
Paśla Kastryčnickaj revalucyi 1917 hoda Krym uvajšoŭ u skład RSFSR. U kastryčniku 1921 hoda była stvoranaja Krymskaja ASSR. U 1945 hodzie aŭtanomija była skasavanaja. U 1954 Krym byŭ pieradadzieny sa składu RSFSR u skład Ukrainskaj SSR. Pa rašeńni refierendumu ad 20 studzienia 1991 Krymskaja ASSR była adnoŭlenaja ŭ składzie niezaležnaj Ukrainy. Paśla pry pryniaćci Kanstytucyi 1992 hoda jana była pieratvoranaja ŭ Respubliku Krym, a paźniej — u Aŭtanomnuju Respubliku Krym.
Ciapier u ARK dziejničaje Kanstytucyja, pryniataja ŭ 1998 hodzie. Stalica Aŭtanomnaj Respubliki Krym — Simfieropal.
Ciapier čytajuć
Los syna prapahandysta sa «Sputnika», jaki pryjšoŭ da biełaruščyny padletkam, vyklikaŭ buru emocyj u jaho siabroŭ1
Los syna prapahandysta sa «Sputnika», jaki pryjšoŭ da biełaruščyny padletkam, vyklikaŭ buru emocyj u jaho siabroŭ
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1414
Kamientary