Na naradzie pa pytańniach udaskanalvańnia strachavoj dziejnaści kiraŭnik dziaržavy zapatrabavaŭ uzmacnić kantrol u hetaj śfiery, kab nie dapuścić «uciečki valuty z krainy».
«Jak mianie infarmujuć, u Biełarusi źjavilisia działki, jakija zarablajuć na raspaŭsiudžvańni siarod biełarusaŭ strachavych polisaŭ zamiežnych arhanizacyj i vyvadzie valuty z krainy. Heta pramoje parušeńnie zakanadaŭstva, ale hetyja samyja działki ŭžo jaki hod paźbiahajuć adkazu. U čym sprava?».
Jon padkreśliŭ, što kantrol za finansavymi patokami pavinien być pastajannym: «Nielha dapuskać uciečki valuty z krainy. Jak i nielha dazvalać peŭnym działkam raskładvać pa kišeniach hrošy, jakija im praktyčna nie prynaležać i nie pavinny prynaležyć».
U jakaści prykładu Łukašenka pryvioŭ našumieły vypadak ź Biełaruskim narodnym strachavym piensijonnym fondam.
«Pryvatnaja strachavaja kampanija za košt srodkaŭ paśpiachovych dziaržaŭnych pradpryjemstvaŭ zabiaśpiečvała zvyšprybytak u miljardy rubloŭ dla svaich akcyjanieraŭ! — aburyŭsia kiraŭnik dziaržavy. — Kaniečnie, paśla majho ŭmiašańnia tam naviali paradak. Ale heta stała padstavaj dla bolš krytyčnaha pozirku na strachavy nahlad, tamu byli dadzienyja adpaviednyja daručeńni ŭradu, Kamitetu dziaržaŭnaha kantrolu, Minfinu».
U suviazi z hetym, adznačyŭ Łukašenka, padrychtavany prajekt ukaza, nakiravany na kompleksnaje ŭdaskanalvańnie pravavoha rehulavańnia strachavoj dziejnaści, jaki vyniesieny na siońniašniuju naradu.
Kiraŭnik dziaržavy pacikaviŭsia mierkavańniem prysutnych, nakolki prapanavany dakumient adpaviadaje sučasnym patrabavańniam u hetaj śfiery.
«My što, budziem znoŭ aryjentavacca na toje, jak u Jeŭropie, Amierycy? Ci my budziem hladzieć na ŭłasnyja intaresy i zychodzić ź ich, kab nie było tak, jak u hetym tak zvanym narodnym fondzie: atrymali prybytak i pa kišeniach raskłali? Pravilna, prybytak treba atrymlivać, u advarotnym vypadku — što heta za dziejnaść biez prybytku? Ale treba ž pahladzieć, kamu dastajucca hetyja adnosna lohkija hrošy», — skazaŭ Łukašenka.
Akramia taho, adznačyŭ jon, treba razhledzieć pierśpiektyvy raźvićcia hetaha siektara, pakolki ŭ ramkach Adzinaj ekanamičnaj prastory stvarajecca ahulny strachavych rynak, dzie ŭ Biełarusi jość adpaviednyja abaviazacielstvy.
«Nakolki my hatovy siońnia da hetaha? Ci adpaviadajuć prapanovy ŭrada tendencyjam intehracyjnych pracesaŭ?» — pacikaviŭsia kiraŭnik dziaržavy.
Nahadajem, ciapier na strachavym rynku Biełarusi dziejničajuć niaroŭnyja ŭmovy haspadarčaj dziejnaści dla dziaržaŭnych i pryvatnych kampanij. U pryvatnaści, tolki dziaržarhanizacyi i arhanizacyi, u statutnych fondach jakich bolš čym 50% dolej (akcyj) znachodzicca va ŭłasnaści dziaržavy, majuć prava zajmacca abaviazkovymi vidami strachavańnia. Akramia taho, tolki ŭ takich arhanizacyj pavinny ažyćciaŭlać strachavańnie dziaržaŭnyja i kantralavanyja dziaržavaj kampanii Biełarusi.
Na dumku ekśpiertaŭ strachavoha rynku, dziejnyja praviły istotna abmiažoŭvajuć patencyjał raźvićcia hetaj śfiery pasłuh.
