Rasijski televiadučy, hiendyrektar ahienctva «Rasija siońnia» Dźmitry Kisialoŭ ŭdzielničaŭ u prahramie Dziarždepartamienta ZŠA. Pra heta siońnia paviedamiŭ u tvitery były amierykanski ambasadar u Maskvie Majkł Makfoł. Jon zhadaŭ pra heta ŭ chodzie abmierkavańnia z karystalnikami «novaj ery» rasijska-amierykanskich adnosinaŭ.
«Kalehi, vašyja «patryjoty» lubiać krytykavać Amieryku, a potym adpačyvać u nas. Kolki viz my vydali hetyja ludziam, kali ja byŭ ambasadaram», — adznačyŭ Makfoł.
Jak paviedamlaje Słon.Ru, Kisialoŭ jeździŭ u ZŠA pa prahramie Dziarždepu ŭ 2010 hodzie. Jaho pajezdka całkam apłačvałasia amierykanskim bokam. Sam televiadučy vielmi niervova adreahavaŭ na prośbu vydańnia prakamientavać heta.
«Vy mnie, kali łaska, bolš nie telefanujcie! Nikoli, pažyćciova, ja vas prašu!» — zajaviŭ Kisialoŭ.
Jak viadoma, asoba Dźmitryja Kisialova patrapiła ŭ list pierson, jakich datyčać sankcyi ES ŭ suviazi z rasijskaj aneksijaj Kryma.
16 sakavika Kisialoŭ u vynikovaj prahramie na «Rasii 1» pryhraziŭ pieratvaryć ZŠA ŭ «radyjoaktyŭny popieł» u vypadku, kali ZŠA raspačnie vajennaje ŭmiašalnictva z-za situacyi z Ukrainaj.
U lutym prezident Uładzimir Pucin uznaharodziŭ Kisialova ordenam «Za zasłuhi pierad Ajčynaj» IV stupieni. U adpaviednym ukazie havorycca, što ŭznaharoda Kisialovu ŭručanaja «za dasiahnutyja pracoŭnyja pośpiechi i značny ŭkład u sacyjalna-ekanamičnaje raźvićcio Rasijskaj Fiederacyi». Akramia taho, prezident padkreśliŭ pośpiechi žurnalista ŭ «humanitarnaj śfiery, umacavańni zakonnaści, abaronie pravoŭ i intaresaŭ hramadzian i šmathadovuju, dobrasumlennuju pracu».
Kisialoŭ viadomy jak adzin z samych žorstkich dziaržprapahandystaŭ.
16 lutaha Kisialoŭ u siužecie «Palityčnaje členaškodnictva» pieradačy «Vieści tydnia» vystupiŭ z rezkaj krytykaj «Echa Maskvy» i viadučych aŭtaraŭ radyjostancyi. Hałoŭnymi abjektami abvinavačvańniaŭ Kisialova stali paet Ihar Ircieńjaŭ i publicyst Viktar Šandarovič, nacyjanalnaść jakich Kisialoŭ nie praminuŭ adznačyć.
8 śniežnia ŭkrainski žurnalist Vital Siediuk padčas pramoha ŭklučeńnia z Płoščy niezaležnaści ŭ Kijevie uvarvaŭsia ŭ kadr telekanała «Rasija 24» i, praciahvajučy butaforskuju statuetku Oskara karespandentu, paprasiŭ pieradać jaje Kisialovu «za chłuśniu i łuchtu pra Jeŭramajdan».
Raniej miedyjny skandał spravakavała vykazvańnie Kisialova ab tym, što nieabchodna «zakopvać sercy hamaseksualistaŭ jak nieprydatnyja dla praciahu novaha žyćcia».
Kamientary