Sumnaviadomy apošnim časam rasijski telekanał NTV abnarodavaŭ siońnia «šakujučyja kadry» ŭkraincaŭ, jakija, maŭlaŭ, płanavali terakty ŭ Rasii.
Pa źviestkach śpiecsłužbaŭ, śćviardžaje rasijski telekanał, terakty rychtavalisia z 14 pa 16 sakavika ŭ siami rehijonach — Rastoŭskaj, Vałhahradskaj, Ćviarskoj, Arłoŭskaj, Biełharadskaj abłaściach i ŭ respublikach Kałmykija i Tatarstan.
Usie zatrymanyja, 25 čałaviek, siarod jakich troje aktyvistaŭ «Pravaha siektara», užo paćvierdzili atrymańnie instrukcyj ad pradstaŭnikoŭ SBU.
Siarod ich zadač była fotazdymka miescaŭ dysłakacyi i ruchu vajennaj techniki ŭzbrojenych sił Rasii ŭ pryhraničnych rehijonach, a taksama ŭstanaŭleńnie kantaktaŭ z rasijskimi radykalnymi strukturami. Zaraz u dačynieńni da zatrymanych pravodzicca daznańnie i papiaredniaje śledstva.
Ukrainskija ŚMI, paviedamlajučy pra hetu «siensacyju», papiaredžvajuć, što repartažy NTV apošnim časam adroźnivajucca časam chłuśnioj i pierakručvańniem faktaŭ.
Tak supała, što siońnia kiraŭnik Słužby biaśpieki Ukrainy Valancin Nalivajčanka i kiraŭnik MUS Ukrainy Arsien Avakaŭ dali bryfinh, dzie zajavili pra datyčnaść FSB Rasii da sprobaŭ kryvavaha razhonu Majdanu 18—20 lutaha, dzie zahinuła bolš za 90 čałaviek.
Tak, kiraŭnik SBU Valancin Nalivajčanka zaznačyŭ, što ŭ płanavańni apieracyi na Majdanie prymali ŭdzieł 26 supracoŭnikaŭ FSB Rasii.
Pavodle jaho słoŭ, hetyja asoby prybyli va Ukrainu ŭ siaredzinie studzienia, i jość infarmacyja, što hrupy byli raźmieščany pad Kijevam na terytoryi vučebnaha centra SBU. Bolš za toje, adznačyŭ Nalivajčanka, tudy byli praviedzieny linii ŭradavaj suviazi, i tahačasny staršynia SBU Alaksandr Jakimienka asabista pryjazdžaŭ da ich na dakład.
