 |
«Našamu ciarpieńniu prychodzić kaniec. My dali zahad abaraniacca pry nastupnym napadzie, zabaraniacca ŭsimi najaŭnymi mahčymaściami, a mahčymaściaŭ u nas dastatkova. I pieradajcie vašamu hienerału Čabanu, što ja abviaščaju jaho niepažadanaj personaj u Hruzii, i ŭ najbližejšyja dni jon niachaj pakinie terytoryiju krainy», — zajaviŭ Michaił Saakašvili.
«Kali jašče raz takoje paŭtorycca, vy ŭciahniecie Rasieju i Hruziju ŭ vielizarnuju pravakacyju. Ja vas papiaredžvaju, što pravakacyjnyja dziejańni ŭ vas nia projduć. My nastrojeny vielmi i vielmi rašuča, kab vy heta dobra zapomnili», — papiaredziŭ hruzinski prezydent.
Incydent adbyŭsia la hruzinskaha siała Hanmuchury, jakoje znachodzicca na abchaskim bierazie pamiežnaj raki Inhury. Nad lahieram zavis rasiejski vajenny samalot, pa jahonym perymetry stali try rasiejskija BTR i sałdaty‑miratvorcy. Zatym rasiejskija sałdaty ŭvajšli na terytoryju lahiera i źbili troch achoŭnikaŭ-słužačych MUS Hruzii. Specnaz Hruzii, što prybyŭ na miesca zdareńnia, prymusiŭ rasiejskich sałdat pakinuć lahier. Paźniej na miesca zdareńnia pryjechaŭ prezydent Hruzii.
Ułady krainy zajavili, što lahier stvorany dla praviadzieńnia kulturnych mierapryjemstvaŭ patryjatyčnaha kštałtu. Ale Rada biaśpieki AAN ŭ lipieni zaklikała Hruziju raspuścić lahier, kab pazbavicca «mahčymaści ŭźniknieńnia incydentaŭ».
