Siabry arhanizacyi Rumoł razdajuć na vulicach Minska hieorhijeŭskija stužki
Ściažki razdajuć z prysoskami, raźlik na toje, što jany buduć bačnyja ŭ mašynach
Siarhiej Łušč kaardynuje razdaču na biełaruskich vulicach rasijskaj simvoliki
Leŭ Kryštapovič
Viktar Małašenka ŭznačalvaje ofis «Rassupracoŭnictva» ŭ Minsku
Kiraŭnikom BPC pryznačyli nie biełaruskaha, a razanskaha
Analiz taho, jakim čynam Rasieja ździajśniaje zachop ziamiel na poŭdni i ŭschodzie Ukrainy, prymušaje pa-inšamu stavicca da taho, što ŭ sučasnaj palitycy pryniata nazyvać «miakkaj siłaj».
Roskvit hetaha paniaćcia pryjšoŭsia na čas «kalarovych revalucyjaŭ» minułaha dziesiacihodździa.
Unutry Rasii kanstrujavali «suvierennuju demakratyju» aŭtarstva Uładzisłava Surkova — kali nibyta i vybary jość, a ŭłada nie mianiajecca. Tuju samuju «miakkuju siłu» Rasija sprabuje raspaŭsiudzić i na krainy Uschodniaj Jeŭropy. Architektarami hetaj stratehii zamiežnaj palityki byli «libierały» Hleb Paŭłoŭski i Siarhiej Karahanaŭ.
Ciapier časy inšyja, krutyja. Rasijskija kiraŭniki zakručvajuć hajki ŭnutry krainy. Jany admovilisia ad raniejšych manipulacyjnych mietadaŭ rehulavańnia hramadskaha žyćcia. Im na źmienu pryjšli pramyja represii i łabavaja prapahanda.
I ŭ śfiery «miakkaj siły» źmianilisia akcenty. Zvykłaja dla stratehii Paŭłoŭskaha-Karahanava padtrymka prarasijskich struktur, stvareńnie analityčnych centraŭ, što pracujuć na rasijskija hrošy, prychavany podkup palityčnych elitaŭ (u tym liku cełych partyjaŭ) choć i nie byli źniatyja z uzbrajeńnia, ale vidavočna pierastali być pryjarytetam. Rej ciapier viaduć asoby, što spaviadajuć daktryny «jeŭrazijstva» i «adnaŭleńnia Impieryi».
Maskva ciapier aryjentujecca na padtrymku ekstremisckich i marhinalnych z punktu hledžańnia elektaralnaj palityki strukturaŭ, a časam navat čysta kryminalnych hrupovak. Zadačaj staŭ nie stolki ŭpłyŭ na biahučaje palityčnaje žyćcio, kolki stvareńnie bazy dla destabilizacyi situacyi na terytoryi niezaležnych dziaržavaŭ u patrebny momant.
Kiravany chaos
Jak my bačym na prykładzie Kryma, hetaja novaja «miakkaja siła» Rasii jość nie prosta sprobaj upłyvu na palityku niezaležnych dziaržavaŭ. Heta «piataja kałona» ŭ pramym sensie hetaha słova, paklikanaja ŭ vypadku kanfliktu stać apiryščam dyviersantaŭ, pravakatarami ci «žyvym ščytom» dla intervientaŭ. Ci, pa mienšaj miery, materyjałam dla prapahandysckaha zabieśpiačeńnia spryjalnaj karcinki.
Jak adznačaje redaktar «Russkoho žurnała» Alaksandr Marozaŭ, realizoŭvać svoj novy hieapalityčny prajekt pucinskaja Rasija budzie z vykarystańniem tych srodkaŭ, jakija ŭžo byli prademanstravanyja va Ukrainie:
— vajenny cisk,
— kupla miascovaha aliharchata i vajskovaha kiraŭnictva,
— stvareńnie «kiravanaha chaosu»,
— vykarystańnie prarasijskich aktyvistaŭ unutry krainy,
— masiravanaje finansavańnie prarasijskich «hramadskich arhanizacyj»,
— masiravanyja prapahandysckija ataki z rasijskich telekanałaŭ, jakija pracujuć na ŭsioj postsavieckaj prastory.
Infrastruktura «miakkaj siły» važnaja tut nie sama pa sabie, a ŭ kompleksie z kampanientam «žorstkaj siły» — hrupiroŭkaj rasijskich vojskaŭ, što navisaje nad susiedniaj krainaj.
Voś takaja «ruskaja viasna» pahražaje lubomu miescu, dzie ŭdałosia stvaryć prarasiejskuju piatuju kałonu na etničnym, moŭnym, kryminalnym albo inšym materyjale.
Padmurak dla «piataj kałony»
U analitykaŭ stałasia ahulnym miescam śćviardžeńnie, što ŭ Biełarusi prarasijskija siły adkryta nie mohuć stać važnym aktaram na palityčnaj arenie. Maŭlaŭ, Alaksandr Łukašenka demanstruje nastolki prarasiejski kurs, što być bolšym siabram Maskvy za dziejnaha kiraŭnika dziaržavy paprostu niemahčyma.
Peŭnaja racyja ŭ takoj acency jość.
Adnak Maskva choča bolšaha, čym maje ciapier. Maskva choča radykalnaha rašeńnia raz i nazaŭždy: kab dziaržaŭnaść Biełarusi była likvidavanaja, a biełarusy pierastali ŭsprymać siabie asobnym narodam. Tamu i Łukašenku Maskva budzie padtrymlivać tolki da toj pary, pakul nie adčuje, što zdolnaja dabicca bolšaha. Fraza Pucina ab «ustupleńni ŭ Rasiju šaściu hubierniami» nie była vypadkovaj.
Pryčyna adsutnaści adkryta prarasijskich palityčnych siłaŭ chutčej u tym, što biełaruskaja palityčnaja sistema nie źjaŭlajecca kankurentnaj, tamu i finansavańnie Maskvoju arhanizacyj, aryjentavanych na elektaralny ŭdzieł, nie maje sensu. Tamu naŭrad ci varta razhladać surjozna sprobu pabudovy prarasijskaj partyi Siarhiejem Kaścianam. Słavianski kamitet Kaściana, vierahodna, padtrymlivajuć u Maskvie, ale nie ŭ bolšaj stupieni, čym Hajdukievičaŭ albo inšych achvotnych zaniać nišu «prarasijskaj apazicyi». Maskva hatovaja trymać niejkija struktury «na karmleńni» pa pryncypie «kab było», ale nie na ich Maskva robić staŭku i nie na ich uskładaje najbolšyja spadziavańni.
Asiarodździe dla raźvićcia prajektaŭ rusafilskaha kštałtu ŭ krainie zastajecca idealnym.
Nielha pieraacanić rolu daminavańnia ruskaj movy ŭ hramadstvie i asabliva ŭ dziaržaŭnym kiravańni i ŚMI. Tryvałym apiryščam dla stvareńnia nibyta łajalnych dziejnamu režymu prarasijskich arhanizacyj źjaŭlajecca najaŭnaść u kirujučym isteblišmencie «zachodniaruskaj» płyni na čale z namieśnikam Infarmacyjnaanalityčnaha centra pry Administracyi prezidenta Lvom Kryštapovičam, a taksama paraniejšamu istotnaj kolkaści čynoŭnikaŭ «savieckaj zahartoŭki», jakija pryzvyčailisia źviarać hadzińnik «pa Maskvie».
Sapraŭdnuju kaštoŭnaść dla Kramla majuć całkam prarasijskija siłavyja struktury Biełarusi, jakija tak i nie zrabilisia nacyjanalnymi i ideałahična (a časam i kadrava) zastajucca padparadkavanymi Maskvie.
Siońnia biełaruskaje vojska i śpiecsłužby vonkava mohuć vyhladać deideałahizavanymi technakratami, ale nasamreč viarchoŭka ich aficerskaha składu prasiaknuta prarasijskimi nastrojami.
U vyniku ŭvieś miechanizm zabieśpiačeńnia dziaržaŭnaj biaśpieki zastajecca biezabaronnym pierad upłyvam z Uschodu. Niešta padobnaje nazirałasia ŭ Krymie i Danbasie, dzie ŭkrainskich siłavikoŭ było śviet, a abaraniać dziaržavu jany nie chacieli.
«Narodnyja masy» dla pravicielaŭ Maskvy zaŭždy byli raschodnym materyjałam. Ich nikoli nie škadavali, kłali miljonami i ŭ Druhuju suśvietnuju vajnu, i pry Piatry I, i pry Stalinu.
Dla «narodnych masaŭ» Biełarusi Maskva maje svoj instrumient upłyvu — heta pravasłaŭnaja carkva, jakaja ŭ nas maje aficyjnuju nazvu Biełaruskaja pravasłaŭnaja carkva ci Biełaruski ekzarchat Maskoŭskaha patryjarchata.
Ale ŭ samim Maskoŭskim patryjarchacie pra toje, što carkva «biełaruskaja», mała chto ŭzhadvaje —s truktura ličycca prostym padzrazdzialeńniem Ruskaj pravasłaŭnaj carkvy. Nie lišnim budzie adznačyć, što navat inšyja kananična zaležnyja ad RPC cerkvy (taja ž Ukrainskaja pravasłaŭnaja carkva MP) majuć bolš vysoki status — samakiravanaj albo aŭtanomnaj carkvy.
Ekzarchat u RPC tolki adzin — Biełaruski.
Apošnim časam stała vidavočna, što taki stan rečaŭ pačaŭ niepakoić i minskija ŭłady. Bo, z adnaho boku, jość vonkavaja ŭzajemnaja padtrymka, udzieł kiraŭnika dziaržavy ŭ nabaženstvach i nibyta poŭnaja «simfonija» ŭłady i carkvy. Ale, z druhoha boku, BPC kirujecca stroha zahadami z kananičnaha centra. Nibyta i Łukašenku BPC padtrymlivaje ŭsiebakova, ale ž kiraŭnik BPC pryznačajecca nie ŭ Minsku. Čarhovym kiraŭnikom BPC u Minsk prysłali archijereja z Razani ź ciomnym minułym. Pasył byŭ jasny: chto b ni ŭładaryŭ ciapier na hetaj ziamli, ale dušy ludziej na joj — kananičnaja terytoryja Maskvy.
Niaŭradavyja i antydziaržaŭnyja
Ale navat pry najaŭnaści takoj hatovaj «piataj kałony», jak prarasijskija śpiecsłužby i carkva, sučasnuju infrastrukturu ideałahičnaha ŭpłyvu nielha ŭjavić sabie biez arhanizacyj «treciaha siektaru». Analityčnyja centry, spartkłuby, kulturnickija i dabračynnyja tavarystvy — heta sapraŭdnyja muskuły «miakkaj siły».
U Biełarusi kolkaść prarasijskich arhanizacyjaŭ nie našmat mienšaja za tuju, što stałasia bazaj kałabarantaŭ na poŭdni i ŭschodzie Ukrainy. Choć kolkasna jany i nie takija šmatlikija. Pakul.
Prarasijskija hramadskija struktury ŭ Biełarusi:
Biełaruskaje hramadskaje abjadnańnie «Ruś»
Respublikanskaje hramadskaje abjadnańnie «Ruskaje tavarystva»
Rasijski kulturnicki centr «Ruś»
Moładzievaje sacyjalna-kulturnaje hramadskaje abjadnańnie «Ruś maładaja»
Mižnarodnaja asacyjacyja moładzievych arhanizacyjaŭ rasijskich suajčyńnikaŭ u Biełarusi
Hramadskaje abjadnańnie «Ruskaje kulturna-aśvietnickaje tavarystva»
Mahiloŭskaje abłasnoje abjadnańnie «Ruski dom»
Viciebskaje hramadskaje abjadnańnie «Ruski dom»
Mižnarodnaje hramadskaje abjadnańnie «Ruś adzinaja»
Biełaruski sajuz hramadskich abjadnańniaŭ rasijskich suajčyńnikaŭ
Mižnarodny ruch «Internacyjanalnaja Rasija»
Infarmacyjna-analityčny partał «Impieryja»
Minskaje tavarystva ruskaj kultury «Ruś»
Kulturna-aśvietnicki prajekt «Zapadnaja Ruś»
Respublikanskaja hramadskaja arhanizacyja «Biełaruskaje kazactva»
Respublikanskaja hramadskaja arhanizacyja «Usiebiełaruskaje abjadnanaje kazactva»
Kazačy konna-spartovy kłub «Jarmak»
Vajenna-patryjatyčny kłub «Kazačy spas»
Nacyjanał-balšavickaja partyja Biełarusi (niezarehistravanaja)
Nie ŭsie z hetych hramadskich abjadnańniaŭ karystajucca vialikaj uvahaj presy. Chiba što tolki śpiecyfičnyja sajty «Impieryja» i «Rehnum» pieryjadyčna aśviatlajuć ich dziejnaść.
Kaniečnie, časam naviny z hetaj supolnaści prychodziać davoli skandalnyja i naŭrad ci źviazanyja z kankretnymi zahadami Kramla (nakštałt vyviešvańnia biełaruskim adździaleńniem NBP abraźlivych transparantaŭ na adras Pucina ŭ časie jahonaha vizitu ŭ Minsk). Ale sama łohika isnavańnia hetych strukturaŭ — heta łohika «miakkaj siły». Kazačyja letniki dla moładzi, spartovyja turniry, kulturnickija imprezy, navukovyja histaryčnyja čytańni adpaviednaha kštałtu i śviatkavańni znakavych dataŭ rasijskaj historyi — heta sposab isnavańnia infrastruktury, kštałtu płanktonu, jakaja ŭ peŭny momant, pad parasonam rasijskaha ekanamičnaha i vajennaha cisku, moža kryštalizavacca dy adyhrać rolu, zhubnuju dla našaj dziaržaŭnaści.
Mahčyma, biełaruskija śpiecsłužby hetyja asiarodki zbolšaha kantralujuć, u tym liku praz ahientaŭ dy infarmataraŭ. Najbolš schilnyja da hvałtoŭnych dziejańniaŭ struktury mohuć być razburanyja represiŭnymi srodkami, jak heta było z hrupoŭkaj hetak zvanych «Aŭtanomnych nacyjanał-balšavikoŭ», čyj lidar Aleh Karpovič u pazaminułym hodzie byŭ asudžany pa artykule 193 KK za dziejnaść niezarehistravanaj arhanizacyi, što nanosić škodu hramadzianam.
Z času źniščeńnia na pačatku 2000-ch strukturaŭ RNIE ŭ Biełarusi sapraŭdnyja paramilitarnyja farmavańni ŭ hetych asiarodkach nie paŭstajuć. Zabojstvy tahačasnych lidaraŭ rasiejskich nacystaŭ u Biełarusi Hleba Samojłava i Maksima Brejnara, a taksama šerah kryminalnych spravaŭ stali jaskravym sihnałam: niahledziačy na ŭsiu rytoryku pra słavianskuju jednaść, polem dla dziejnaści vajenizavanych nacysckich arhanizacyjaŭ Biełaruś nie budzie.
Prarasijskija nacysty ŭ Biełarusi isnujuć, ale dziejnaść svaju nie afišujuć i chavajuć u lehalnych zarehistravanych arhanizacyjach spartovaha ci kulturnickaha nakirunku (hł. śpis vyšej).
U toj ža čas nie treba pierabolšvać upłyvu KDB na hetyja asiarodki.
Pa-pieršaje, jak adznačałasia, značnaja častka śpiecsłužboŭcaŭ adčuvajuć idejnuju jednaść z rusafilskimi hrupoŭkami i, vierahodna, niekatoryja časam spryjajuć ich dziejnaści.
Pa-druhoje, sami rusafiły staviacca da kantrolu z boku śpiecsłužbaŭ dosyć spakojna. Dla ich heta dadzienaść, ad jakoj nie syści, ale pry demanstracyi łajalnaści jany sprabujuć jaje vykarystać na svaju karyść praz uzajemavyhadnaje supracoŭnictva.
Asablivaj uvahi siarod strukturaŭ rasijskaj «miakkaj siły» zasłuhoŭvajuć moładzievyja arhanizacyi. Padziei va Ukrainie dobra prademanstravali, što va «ŭmiełych rukach» mienavita «maładziožki» mohuć źjaŭlacca łakamatyvami hramadskich chvalavańniaŭ.
U Biełarusi dastatkova časta stvarajucca adździaleńni rasijskich moładzievych arhanizacyjaŭ — dla niekatorych dziejačaŭ (u tym liku źviazanych z BRSM) heta vyhadny biznes. Asabliva papularny jon byŭ u tyja časy, kali Kreml z padačy Surkova ščodra finansavaŭ moładzievyja arhanizacyi samaj roznaj skiravanaści — aby kantralavać patencyjnyja «aranžavyja» asiarodki. Isnavali i biełaruskija adździaleńni AKM, i biełaruskija «Našy». Delehacyja ź Minska jeździła na słavutyja letniki na Sielihiery i h.d. Na dadzieny momant aktyŭnaść Kramla ŭ hetym kirunku pamienšała, ale i ciapier jość ušłyja działki, hatovyja źjavicca ŭ Duhina ŭ jakaści «Biełaruskaha adzialeńnia Jeŭrazijskaha sajuza moładzi».
Na źjeździe ruchu «Internacyjanalnaja Rasija» ŭ 2011 biełaruskaja delehacyja vystupiła ź inicyjatyvaj stvareńnia na jaho bazie «Jeŭrazijskaha narodnaha frontu». U hetuju delehacyju uvajšli:
kiraŭnik arhkamiteta ruchu «Za Sajuz Biełarusi i Rasii», kiraŭnik infarmacyjnaanalityčnaha partała «Impieryja» (Minsk) Juryj Barančyk (ciapier pierajechaŭ na pracu ŭ Maskvu);
kiraŭnik infarmacyjnaanalityčnaha partała «Zachodniaja Ruś» (Minsk) Ihar Zielankoŭski;
ad hramadskaha abjadnańnia «Novaja ekanomika» (Minsk) —Siarhiej Šypcienka;
ad Viciebskaha hramadskaha abjadnańnia «Ruski dom» (Viciebsk) — Andrej Hieraščanka;
ad Hramadskaha abjadnańnia čuvašoŭ «Šupaškar» (Minsk) — Barys Milin;
ad Viciebskaj haradskoj hramadskaj arhanizacyi «Ruski kulturny centr «Ruś» —Alaksiej Mišurny;
ad Mižnarodnaha hramadskaha abjadnańnia čuvašoŭ «Atał» (Minsk) — Hienadź Alaksandraŭ;
ad hramadskaha abjadnańnia «Ruski Dom» ( Mahiloŭ) — Juryj Vałabujeŭ;
staršynia praŭleńnia hramadskaha abjadnańnia «Rehijon» (Homiel ) Valeryj Bandarenka;
kiraŭnik moładzievaha hramadskaha abjadnańnia «Avanhard» (Minsk) Marat Abramoŭski.
Hetyja struktury małalikija (a časam i čystyja fikcyi), ale jość siarod ich i sapraŭdy dziejsnyja arhanizacyi, časam zasnavanyja na arhanizacyjnaj bazie praŭładnych aficyjnych abjadnańniaŭ, kštałtu BRSM i «Biełaj Rusi».
U płyni prarasijskich «maładziožak» u Biełarusi vyłučajecca Moładzievaje sacyjalnakulturnaje hramadskaje abjadnańnie «Ruś maładaja» (skaročna — Rumoł, faktyčna častka adnajmiennaha mižnarodnaha ruchu ŭ roznych krainach). Jaho lidar Siarhiej Łušč maje vydatnyja adnosiny jak ź biełaruskimi ŭładami (pa linii «aficyjnaj moładzievaj palityki»), tak i z pasolstvam RF u Minsku (pa linii Rassupracoŭnictva, praviadzieńnia raznastajnych kanfierencyjaŭ, spartovych turniraŭ pa karate i h.d.).
Rumoł hladzić na Biełaruś praz pryzmu daktryny «Ruskaha mira»: «Ruski mir» — heta cyvilizacyjnaje paniaćcie, suśvietnaja supolnaść ludziej, što atajasamlivajuć siabie z ruskaj movaj, ruskaj kulturaj, duchoŭnymi centrami jakoj vystupajuć Vialikaja, Małaja i Biełaja Ruś. Asnovaj «Ruskaha mira» źjaŭlajecca tryadziny Ruski narod (vialikarosy, małarosy i biełarusy). Pry hetym da ruskaj cyvilizacyi, niesumnienna, adnosiacca i inšyja histaryčna siabroŭskija Rusi i słavianstvu narody.
Ciapier hetaja arhanizacyja, ź inicyjatyvy pasolstva RF, faktyčna robicca adzinym kaardynacyjnym centram dla roznaha kštałtu prarasijskich «maładziožak», što apaviadaje zaćvierdžanaj u Maskvie stratehii ich raźvićcia
Staršynia Rumoł Siarhiej Łušč na adkryćci turnira pa karate ŭ Minsku 21 śniežnia 2013 h.: Tolko zdorovaja, triezvomyślaŝaja, silnaja duchom mołodiež možiet sozidať buduŝieje. Buduŝieje sojuznoho hosudarstva i buduŝieje jedinoho russkoho mira, časťju kotoroho naravnie so svoimi jedinorodnymi mołodymi braťjami iz Ukrainy i Rośsii ona javlajetsia.
Pavodle našych źviestak, mienavita asiarodździe Rumoła arhanizuje vizity ŭ Biełaruś rasijskich hastraloraŭ, kštałtu «Ciesaka»Marcinkieviča, a taksama arhanizoŭvaje akcyju razdačy ŭ roznych haradach Biełarusi rasijskich «trykałoraŭ» (rukami hłuchaniamych vykanaŭcaŭ).
Pakul što rusafilskija struktury demanstrujuć łajalnaje staŭleńnie da dziejnaha ŭ Biełarusi režymu. Adnak,
jak adznačaje navat blizki da ich pa pohladach pradstaŭnik prajekta «Cytadel» Alaksandr Špakoŭski, praktyčna ŭsie lidary rusafilskaj supolnaści ŭ Biełarusi (Juryj Barančyk, Ihar Zielankoŭski, Siarhiej Łušč, Alaksandr Hronski) «vielmi nieadnaznačna staviacca da suvierennaha biełaruskaha prajektu, časta skatvajucca na pazicyi admaŭleńnia prava biełaruskaj nacyi na samavyznačeńnie, skieptyčna staviacca da biełaruskaj movy, kultury, aficyjnaj viersii biełaruskaj historyi».
Cukierki novyja, «Kramloŭskija»
Dla taho, kab raźvivać i padtrymlivać infrastrukturu «miakkaj siły» ŭ patrebnym stanie, nieabchodnaje finansavańnie. Pry hetym dla paśpiachovaści razhortvańnia strukturaŭ maje značeńnie nie tolki abjom srodkaŭ, ale i ich efiektyŭnaje i metanakiravanaje vydatkoŭvańnie.
Mienavita dziela hetaha apošnim časam Kreml uziaŭ kurs na bolšuju centralizacyju «padtrymki suajčyńnikaŭ za miažoj». Biudžet Fiederalnaha ahienctva pa spravach SND, suajčyńnikaŭ, jakija pražyvajuć za miažoj, i pa mižnarodnym humanitarnym supracoŭnictvie (Rassupracoŭnictva) uvieś čas pavialičvajecca, a pasolstva RF u Minsku pieraŭtvarajecca ŭ hałoŭny centr raźmierkavańnia dapamohi rusafilskim arhanizacyjam.
Ofis Rassupracoŭnictva ŭ Minsku mieścicca ŭ Domie Maskvy na ŭźbiarežžy Śvisłačy. Mienavita adsiul kaardynujucca akcyi nakštałt raspaŭsiudu «hieorhijeŭskich stužačak» (tych, što atrymali ŭ narodzie mianušku «kałaradskich»).
Finansavańnie rusafilskaj dziejnaści pa dypłamatyčnaj linii ŭ Biełarusi praduhledžanaje admysłovym Pahadnieńniem pamiž Uradam Respubliki Biełaruś i Uradam Rasijskaj Fiederacyi ab zasnavańni i ŭmovach dziejnaści kulturnainfarmacyjnych centraŭ ad 10 śniežnia 2009. Na 2014 hod ahienctvam zapłanavana realizacyja vydavieckaha prajekta «Biełaruś jak ruskaja śviatynia», fest kazačaj pieśni dy šerah inšych prahramaŭ.
Pry hetym rasijski bok asabliva nie abciažarvaje siabie vykanańniem patrabavańniaŭ dekreta №24, jaki vyznačaje paradak atrymańnia i raźmierkavańnia zamiežnaj biazvypłatnaj dapamohi (parušeńnie zakanadaŭstva ŭ hetaj śfiery ad 2011 hoda źjaŭlajecca ŭ Biełarusi kryminalnym złačynstvam).
Biełaruskija śpiecsłužby pilna adsočvajuć i časam prypyniajuć zamiežnaje finansavańnie hramadskich arhanizacyjaŭ z boku zachodnich fondaŭ, ale skroź palcy hladziać na finansavyja płyni z uschodu. Aprača Rassupracoŭnictva, na terytoryi Biełarusi faktyčna bieskantrolna dziejničaje ceły šerah donarskich strukturaŭ, jakija finansujuć dziejnaść prarasijskich strukturaŭ: Fond «Ruski mir», Instytut ruskaha zamiežža, Rasijski Instytut stratehičnych daśledavańniaŭ, Fond publičnaj dypłamatyi imia A.M.Harčakova, Instytut krain SND (Instytut dyjaspary i intehracyi).
Pa słovach samich pradstaŭnikoŭ rusafilskich arhanizacyjaŭ, ukrainskija padziei patencyjna mohuć na niejki čas pieranakiravać finasavyja płyni ad Rassupracoŭnictva na poŭdzień, adnak, jak jany kažuć, Maskva ŭpeŭnivaje biełaruskich rusafiłaŭ, što ŭ doŭhaterminovaj pierśpiektyvie finansavańnie strukturaŭ u Biełarusi budzie tolki pavialičvacca.
Na hetuju situacyju sprabavała źviarnuć uvahu Partyja BNF, jakaja ŭ zajavie Sojmu ad 15 sakavika zaklikała «biełaruskija ŭłady abmiežavać dziejnaść, jakaja supiarečyć zakanadaŭstvu Respubliki Biełaruś, takich destruktyŭnych rasiejskich centraŭ, jak Rassupracoŭnictva i Fond Harčakova, a taksama zarehistravanych u Biełarusi arhanizacyjaŭ, što atrymlivajuć finansavuju dy inšuju padtrymku z hetach centraŭ».
Ale pakul «zachodniarus» Leŭ Kryštapovič zajmaje kiraŭničuju pasadu ŭ Administracyi prezidenta, a viadomy baraćbit suprać biełaruskaj movy Ihar Karpienka źjaŭlajecca namieśnikam kiraŭnika Minharvykankama, «piataja kałona» Maskvy pačuvajecca ŭpeŭniena.
