Učora padčas pasłańnia da naroda i parłamienta ŭspomniŭ asobu byłoha viciebskaha čynoŭnika Andreja Hieraščanki. Nie nazyvajučy proźvišča aktyvista rasiejskaha ruchu, Łukašenka vykazaŭ ździŭleńnie, što jaho dahetul nie vykinuli ź Biełarusi.
«Da takich ludziej padychodzić jak da dyviersantaŭ!» — zahadaŭ jon.
Łukašenka nazyvaŭ absalutnym hłupstvam vykazvańni niekatorych dziejačoŭ ab ucisku ruskich i ruskamoŭnych u Biełarusi.
«Ja b nie vyklučaŭ, što infarmacyja prezidentu padajecca nieabjektyŭna, nie vyčarpalnaja. My nikoli nie kazali pra ahulny ŭcisk ruskamoŭnych ci ruskich. Havorka išła pra kankretnyja vypadki: nazvy vulic, stancyj mietro, uvohule pracy Tapanimičnaj kamisii», - kaža staršynia viciebskaj arhanizacyi «Ruski dom» Andrej Hieraščanka.
«Viadoma, prablema Kryma, Paŭdniovaha Uschodu Ukrainy padšturchoŭvajuć Łukašenku aryjentavacca na niejkich nacyjanalnych momantach. Heta ŭsio zrazumieła, ale treba niejak bolš spakojna abhruntoŭvać svaju pazicyju. Zanadta šmat emocyj było va ŭčorašnim vystupie».
Andrej Hieraščanka spadziajecca, što «napružanaść, prablemnyja momanty buduć źniatyja ŭ vyniku chutkaha vizitu ŭ Minsku Uładzimira Pucina».
Učora na naradzie Łukašenka addaŭ zahad KDB spyniać usialakija razmovy ab ucisku ruskich.
«My nie parušajem zakony. Dziejničajem u pravavym poli, — kaža Hieraščanka. — Nijakich prablem z KDB i inšymi śpiecsłužbami nie isnavała. Nie źjaviłasia ich pakul i paśla ŭčorašniaha vystupu».
