Viarchoŭny pradstaŭnik ES pa zamiežnych spravach Ketryn Eštan «rašuča asudziła» pryviadzieńnie ŭ vykanańnie ŭ Biełarusi śmiarotnaha pryhavoru Paŭłu Sielunu. Adpaviednaja zajava raźmieščana na sajcie Jeŭrapiejskaj słužby źniešnich dziejańniaŭ.
«Viarchoŭny pradstaŭnik uśviedamlaje surjoznaść złačynstvaŭ, za jakija jon (Sialun) byŭ asudžany. Adnak jana nie ličyć, što śmiarotnaja kara moža być kali-niebudź apraŭdana. Jeŭrapiejski sajuz vystupaje suprać śmiarotnaj kary pry lubych akaličnaściach», — cytuje Eštan Jeŭrapiejskaja słužba źniešnich dziejańniaŭ.
U paviedamleńni adznačajecca, što śmiarotnaja kara — žorstkaje i niehumannaje pakarańnie, jakoje nie zdolnaje vystupać u jakaści faktaru strymlivańnia i ŭjaŭlaje saboju niedapuščalnaje admaŭleńnie čałaviečaj hodnaści.
«Viarchoŭny pradstaŭnik patrabuje, kab Biełaruś — adzinaja kraina ŭ Jeŭropie, jakaja pa-raniejšamu prymianiaje śmiarotnuju karu, — dałučyłasia da suśvietnaha maratoryja na śmiarotnuju karu jak da pieršaha kroku na šlachu jaje poŭnaj admieny», — padkreślivajecca ŭ paviedamleńni.
Nahadajem, pra pakarańnie śmierciu 23-hadovaha Paŭła Sieluna, pryznanaha vinavatym u zabojstvie dvuch čałaviek «z asablivaj žorstkaściu», stała viadoma 18 krasavika dziakujučy pravaabaroncam. Na momant pakarańnia śmierciu skarha Sieluna na śmiarotny prysud znachodziłasia na razhladzie Kamiteta AAN pa pravach čałavieka.
Biełaruś — adzinaja kraina ŭ Jeŭropie, dzie dahetul prymianiajecca śmiarotnaja kara, a taksama adzinaja jeŭrapiejskaja dziaržava, jakaja nie ŭvachodzić u Saviet Jeŭropy. Asnoŭnaj pieraškodaj dla ŭvachodžańnia źjaŭlajecca najaŭnaść śmiarotnaj kary.
Pavodle źviestak «Mižnarodnaj amnistyi» i kampanii «Pravaabaroncy suprać śmiarotnaj kary ŭ Biełarusi», za apošnija 20 hadoŭ u krainie pakarana bolš jak 400 čałaviek. U adkaz na zakliki pravaabaroncaŭ uvieści maratoryj na śmiarotnuju karu abo admianić jaje ŭłady spasyłajucca na vyniki refierendumu 1996 hoda, padčas jakoha bolšaść biełaruskich hramadzian vystupili za zachavańnie śmiarotnaj kary.
