U MZS Rasii ličać, što va Ukrainie parušajuć pravy čałavieka i pieraśledujuć inšadumcaŭ.
U Ministerstvie zamiežnych spraŭ Rasii taksama zaniepakojenyja losam sieparatysta i «narodnaha hubiernatara» Paŭła Hubarava. U viedamstvie ličać, što Hubarava katavali, mienavita tamu jon pravodzić biesterminovuju haładoŭku. Hetyja fakty nibyta paćviardžajuć naziralniki Śpiecyjalnaj manitorynhavaj misii ABSIE.
«Skrajni niespakoj taksama vyklikajuć dadzienyja ŚMI ab farsiravanym budaŭnictvie ŭ Ukrainie bujnych izalataraŭ časovaha ŭtrymańnia na tysiačy čałaviek nibyta dla raźmiaščeńnia niezakonnych mihrantaŭ. Takoj kolkaści nielehałaŭ na Ukrainie niama,
a zbudavańni, pa infarmacyi ŚMI, vielmi nahadvajuć fašysckija kancentracyjnyja łahiery. Mimavoli ŭźnikaje pytańnie, ci nie płanuje kijeŭski režym zahaniać tudy niazhodnych suhramadzian z paŭdniova-ŭschodnich rehijonaŭ krainy»,
— havorycca ŭ zajavie MZS.
U viedamstvie taksama ŭ čarhovy raz i abvinavacili Ukrainu ŭ nievykanańni ženieŭskich damoŭlenaściej i «masavych pieraśledach inšadumcaŭ, palityčnych hanieńniach».
MZS RF vystupiŭ za nieadkładnaje vyzvaleńnie sieparatysta Hubarava «i inšych źniavolenych kijeŭskaha režymu». Akramia hetaha, u viedamstvie ličać, što kiraŭnictva Savieta Jeŭropy i ABSIE, mižnarodnych pravaabarončych arhanizacyj pavinny žorstka asudzić fakty parušeńniaŭ pravoŭ čałavieka, jakija nibyta adbyvajucca va Ukrainie.