Alaksandr Łukašenka 3 maja ŭ Barysavie ŭ razmovie z pracoŭnym kalektyvam SZAT «BiełDžy», zajaviŭ, što Biełaruś nie moža na škodu sabie ŭvajści ŭ JEES na niaroŭnych umovach.
Jak paviedamlaje ahienctva BiełTA, Łukašenka padkreśliŭ, što kali Biełaruś, Rasija i Kazachstan damaŭlajucca ab stvareńni sajuza, «značyć, pieraškod ŭžo być nie pavinna i ŭsie pavinny pracavać u roŭnych umovach». «Tak ja pastaviŭ pytańnie pierad svaimi kalehami-prezidentami», — raspavioŭ Łukašenka ab sustrečy kiraŭnikoŭ dziaržaŭ «trojki» ŭ Minsku 29 krasavika na pasiadžeńni Vyšejšaha Jeŭrazijskaha ekanamičnaha savieta.
Kiraŭnik dziaržavy ličyć nieabchodnym napiaredadni stvareńnia JEAES vyrašyć z krainami-partniorami ŭsie prablemnyja pytańni. «Siońnia my viadziom dyjałoh, pierš za ŭsio, z Rasijaj, jak «ustakanić» hetyja pytańni. Jany ŭ bližejšy čas buduć vyrašanyja, bo ŭ kancy maja my pavinny padpisać damovu ab stvareńni ekanamičnaha sajuza, tamu ŭsie pytańni pavinny być źniatyja. U advarotnym vypadku my nie možam pajści na škodu sabie na niaroŭnych umovach u hety ekanamičny sajuz. Choć, jašče raz heta padkreślu, my vielmi ŭ hetym zacikaŭlenyja i niamała zrabili dla stanaŭleńnia hetaha ekanamičnaha sajuza», — skazaŭ Łukašenka.
Na dumku kiraŭnika dziaržavy, całkam naturalna, što kožnaja kraina sprabuje baranić svoj rynak, ale kali stvarać sajuz, dyk treba spačatku damovicca pra raŭnapraŭnyja umovy pracy.
