4 maja, na scenie B&W Hallerne ŭ Kapienhahienie adbudziecca adkryćcio 59-ha piesiennaha konkursu Jeŭrabačańnie. U konkursie buduć udzielničać pradstaŭniki 37 krain-udzielnic.
Bukmiekiery nazyvajuć armianskaha vykanaŭca Arama hałoŭnym pretendentam na pieramohu
Deviz sioletniaha Jeŭrabačańnia — Dałučajsia da nas (JoinUs). Paŭfinały konkursu projduć 6 i 8 maja (aŭtorak i čaćvier), finał — 10 maja (subota).
Biełaruś (vykanaŭca Tea) budzie ŭdzielničać u druhim paŭfinale, pad numaram 10. Ale bukmiekiery aceńvajuć šancy nie vielmi — 251,0.
Bukmiekiery z William Hill, a hetyja chłopcy redka pamylajucca, nazyvajuć hałoŭnym favarytam konkursu pradstaŭnika Armienii Aram MP3 (kaeficyjent 3,0).
Jaho ščymlivaja pieśnia Not Alone lidziruje ŭ prahladach na Youtube, tolki aficyjny rolik prahladzieła bolš za 2,6 młn čałaviek. Aram vystupić u pieršym paŭfinale 6 maja pad numaram 1.
Na druhoje miesca bukmiekiery pastavili šviedskuju śpiavačku Sania Nilsen (kaeficyjent vierahodnaści taksama vysoki — 3,75).
Na 3-je miesca, ale z značnym adstavańniem, bukmiekiery adpravili viasiołuju pieśniu pradstaŭnika Danii Basima (11,00).
Za apošnija dni, pavodle William Hill, mocna vyraśli šancy va ŭkrainskaj pryhažuni Maryi Jaremčuk (jana abyšła Narviehiju, Brytaniju i dahnała Daniju, i kaeficyjent užo 11,00).
Maryja — dačka znakamitaha śpievaka 1970—pačatku 1990-ch Nazaryja Jaremčuka, jaki zrabiŭ ukrainskuju pieśniu miehapapularnaj u SSSR. Mienavita «Červona Ruta» ŭ jaho vykanańni (śpiavaŭ spačatku z aŭtaram U.Ivasiukom) stała chitom 1970 h.
I pieśnia ŭ Maryi dobraja, i sercy jeŭrapiejcaŭ mohuć na baku Ukrainy ŭ hetyja niespakojnyja majskija dni.
Rasija, darečy, užo nastrojvajecca na toje, što jaje «prakaciać» na Jeŭrabačańni z-za dałučeńnia Kryma i ahresii va Ukrainie (bukmiekiery aceńvajuć šancy siaścior Tałmačovych, 51,0).
Piataje miesca bukmiekiery addajuć brytanskaj śpiavačcy Moli (13,00)
Taki ž kaeficyjent u vienhierskaha prajekta Andraš Kałaj-Saŭnders
Skandalna-epatažnaja aŭstryjskaja śpiavačka Kančyta Viurst uvachodzić u dziasiatku, ale na Youtube jaje rolik dahaniaje pa papularnaści Armieniju.
Darečy, sioleta spaŭniajecca 40 hadoŭ jak na «Jeŭrabačańni» tryumfalna pieramahła šviedskaja ABBA ź pieśniaj Waterloo