Bilety na Čempijanat raźmiarkoŭvali pa ŭniviersitetach, ciapier da treci miescaŭ na trybunach pustuje
Mnohija prosta nie prychodziać.
Zhodna z aficyjnym pratakołam matča Šviecyja—Čechija, raźmieščanym na sajcie Mižnarodnaj chakiejnaj fiederacyi, hulniu naviedała 6018 čałaviek. Pry hetym umiaščalnaść «Čyžoŭka-Areny» — 9614. Heta značyć, arena była pustoj na tracinu.
Ź inšymi hulniami situacyja padobnaja. Słavakija—Čechija — 6900 hledačoŭ (choć kvitkoŭ u prodažy pierad hulnioj nie zastavałasia). Finlandyja—Łatvija — 11700 (matč prachodziŭ na «Minsk-Arenie», jaje ŭmiaščalnaść — 15086 čałaviek).
Nie źbirajuć anšłahu navat matčy z udziełam zbornaj Biełarusi. Na hulniu z amierykancami pryjšło 13600 čałaviek, z Kazachstanam — 13734, sa šviejcarcami — 13207. Rekord u rasijan — ich matč sa zbornaj ZŠA naviedali 14124 čałavieki.
Čamu čempijanat nie źbiraje anšłahaŭ, choć usie kvitki raskuplenyja?
U intervju «Presbołu» pamočnik kiraŭnika krainy pa sporcie Maksim Ryžankoŭ tłumačyć volnyja miescy na trybunach tak:
«Reč u tym, što Mižnarodnaja fiederacyja chakieja razam z partniorskaj kampanijaj Infront, jakaja zajmajecca arhanizacyjaj čempijanataŭ śvietu, branirujuć na ŭsie matčy kala troch tysiač biletaŭ dla raźmiaščeńnia žurnalistaŭ, kamand, jakija ŭdzielničajuć u turniry, i svaich haściej».
Ale sprava nie tolki ŭ hetym. U prafkamie studentaŭ Biełaruskaha nacyjanalnaha techničnaha ŭniviersiteta raskazvajuć, što tolki pa prafsajuznaj linii razyšłosia 200 chalaŭnych kvitkoŭ: «My biaspłatna razdavali kvitki. Univiersitet zakuplaŭ, a my biaspłatna razdavali svaim aktyvistam. Usiaho prafkam razdaŭ 200 kvitkoŭ. A kolki ŭ cełym pa ŭniviersitecie, ja vam nie skažu — tam bolš budzie».
Nie dziva, što nabyć kvitok nielehalna praź internet i pa zavyšanaj canie — zusim nie prablema.
I heta jašče nie ŭsio. Zhodna z dadzienymi Pamiežnaha kamiteta, za try pieršyja dni čempijanatu ŭ Biełaruś pa kvitkach zamiest viz pryjechała 4500 chakiejnych «zaŭziataraŭ» ź niechakiejnaj Polščy. Kolki ź ich dajechała da ladovych aren biełaruskaj stalicy, možna tolki zdahadvacca. Kvitok ža kaštavaŭ mienš, čym viza, i kupić jaho było praściej.
X
Ciapier čytajuć
Trend siarod biełaruskich zumieraŭ i milenijałaŭ: usio bolš moładzi viartajecca žyć da baćkoŭ3
Kamientary