Novyja zajavy dyktatara — pramoje pryznańnie ŭ parušeńni zakona.
Usie padtasoŭki adbyvajucca nie ŭ rajonnych kamisijach, a na vybarčych učastkach.
Pra heta zajaviŭ namieśnik kiraŭnika PC «Viasna», juryst Valancin Stefanovič.
— U intervju Ksienii Sabčak Alaksandr Łukašenka raskazaŭ pra miechanizmy falsifikacyi «vybaraŭ». Jakaja adkaznaść praduhledžanaja za heta?
— Sprava ŭ tym, što heta nie pieršy raz, kali Łukašenka kaža pra falsifikacyi. Kaliści jon zajaviŭ, što daŭ zahad pamienšyć adsotak tych, chto prahałasavaŭ za jaho. I ŭ pryncypie na hetuju temu ŭžo padavalisia zvaroty ŭ Hienieralnuju prakuraturu z patrabavańniem dać pravavuju acenku hetym faktam, ale jana nie ŭbačyła ŭ hetym składu złačynstva.
U Kryminalnym kodeksie Biełarusi jość šerah artykułaŭ, datyčna parušeńnia zakanadaŭstva ab vybarach. Ale ŭ dadzienym vypadku treba ŭličvać, što hetyja zajavy robić vyšejšaja słužbovaja asoba, i tavaryšam «deputatam», jakija siadziać u «parłamiencie», varta było b pačasać svaje hałovy i spytać u Łukašenki, jak takoje mahčyma. Ja dumaju, što ŭ narmalnaj krainie deputaty mahli b u takim vypadku pastavić pytańnie ab impičmiencie za parušeńnie zakanadaŭstva.
— Biełaruski kiraŭnik padkreśliŭ, što ŭsie falsifikacyi ažyćciaŭlajucca ŭ rajonnych kamisijach. Ci tak heta na samoj spravie?
— Nie, jany ŭ rajonnych kamisijach nie adbyvajucca. Kali Sabčak spytała, što, kali pastavić kamiery na vybarčych učastkach, jon skazaŭ, maŭlaŭ, ničoha ad hetaha nie źmienicca, tamu što falsifikacyi možna ažyćciaŭlać inšymi šlachami. Heta hučała ŭ takim kantekście. A falsifikacyi ŭsie adbyvajucca na vybarčych učastkach, a nie na ŭzroŭni vyšejstajačych vybarčych kamisijaj. U advarotnym vypadku ich było b vielmi lohka ŭstanavić. Dla hetaha biarecca vybarka 15% učastkaŭ pa krainie, dzie vielmi chutka zdymajecca infarmacyja aficyjnych pratakołaŭ adrazu ž paśla zakančeńnia hałasavańnia. Usio heta vyličvajecca, što daje mahčymaść vielmi chutka mieć infarmacyju ab vynikach hałasavańnia z chibnaściu ŭ 2%.
