 |
HA «Achova ptušak Baćkaŭščyny», zaniepakojenaja praviadzieńniem štohadovaha viesnavoha palavańnia, źviarnułasia da Biełaruskaj pravasłaŭnaj carkvy. Amatary ptušak śćviardžajuć, što palavańnie ŭviesnu niehatyŭna adbivajecca na ŭznaŭleńni i kolkaści šmat jakich vidaŭ fauny.
«Achova ptušak Baćkaŭščyny» nahadvaje, što ŭ ZŠA i Kanadzie viesnavoje palavańnie na ptušak zabaroniena z 1913 hoda, hetkaje palavańnie ŭžo zabaroniena i ŭ susiedziaŭ — Rasii i Ukrainie. Viadomaja dyrektyva Rady Jeŭropy ab achovie dzikich ptušak taksama zabaraniaje palavańnie ŭ pieryjad ich razmnažeńnia i viartańnia da miescaŭ hadavańnia ptušaniat.
«Usia pryroda, u tym liku i śviet ptušak, dadziena čałavieku jak dar Tvarca. U asnovach sacyjalnaj kancepcyi Ruskaj pravasłaŭnaj carkvy adnym z hałoŭnych pryncypaŭ pazicyi Carkvy ŭ pytańniach ekałohii pryznajecca pryncyp adzinstva i cełasnaści stvoranaha Boham śvietu», — havorycca ŭ adkazie Biełaruskaha ekzarchata «Achovie ptušak Baćkaŭščyny».
U BPC zaznačajuć, što palavańnie ŭviesnu zaraz pravodzicca nie dziela nasyčeńnia hoładu i charčavańnia siemjaŭ, ale «bolej dziela taho, kab patrafić palaŭničym schilnaściam i dahadzić asabistaj hanarystaści, jakaja časta pryhłušaje zahady sumleńnia».
«Biełaruskaja dziaržava pravodzić vialikuju pracu ŭ halinie achovy pryrody. Tamu Pravasłaŭnaja carkva padtrymlivaje inicyjatyvu HA «Achova ptušak Baćkaŭščyny» i zaklikaje adpaviednyja dziaržaŭnyja ŭstanovy źviarnuć uvahu na hetuju prablemu i pryniać dadatkovyja miery pa achovie pryrodnaha nabytku Respubliki Biełaruś», — zajaŭlajuć u Biełaruskim ekzarchacie.
