Biełaruś i Kazachstan nie padtrymali Rasiju ŭ pytańni supolnaha ŭviadzieńnia impartnych mytaŭ na ŭkrainskija tavary. Pra heta raskazaŭ siabar rady Jeŭrazijskaj ekanamičnaj kamisii ad Biełarusi Siarhiej Rumas, kamientujučy vyniki pasiadžeńnia rady JEEK, što adbyłosia ŭ Sočy ŭ paniadziełak.
«Učora Rasijskaja Fiederacyja ŭniesła na pasiadžeńnie Rady JEEK pytańnie ab supolnym uviadzieńni impartnych pošlin na ŭkrainskija tavary ŭ suviazi z płanavanym padpisańniem Ukrainaj ekanamičnaj častki Pahadnieńnia ab asacyjacyi ź Jeŭrasajuzam. Biełaruski bok vystupiŭ rezka suprać hetaha rašeńnia, matyvujučy tym, što Pahadnieńnie ab asacyjacyi Ukraina jašče nie padpisała, i my nie možam acanić, jakija pahrozy heta niasie dla ekanomiki krain Mytnaha sajuza. Analiz nastupstvaŭ nie razhladaŭsia i ŭ Kalehii Jeŭrazijskaj ekanamičnaj kamisii. Takim čynam, nieabchodnaści ŭ terminovym pryniaćci hetaha rašeńnia niama. Biełaruś u hetym pytańni padtrymaŭ Kazachstan», — skazaŭ Rumas.
«U suviazi z tym, što kansensusnaje rašeńnie nie było pryniata, Rasija zhodna z narmatyŭnym dakumientam AEP maje prava na samastojnaje ŭviadzieńnie mytaŭ», — dadaŭ jon.
Jak paviadzie siabie Biełaruś paśla padpisańnia Ukrainaj Pahadnieńnia ab asacyjacyi ź Jeŭrasajuzam? «My budziem ažyćciaŭlać manitorynh ŭkrainskaha impartu i ŭ vypadku ŭźniknieńnia pahroz dla biełaruskaj ekanomiki majem prava viarnucca da razhladu achoŭnych mier», — skazaŭ jon.
Siarhiej Rumas admoviŭsia kamientavać ŭviadzieńnie Biełaruśsiu licenzavańnia ŭ dačynieńni da ŭkrainskaha piva i kandytarskich vyrabaŭ. Va Ukrainie nazvali hetyja dziejańni «niesiabroŭskimi i dyskryminacyjnymi».
Nahadajem, što ŭčora pa vynikach pasiadžeńnia Rady JEEK pieršy vice-premjer RF Ihar Šuvałaŭ zajaviŭ, što rašeńnie ab abaronie rynku Rasii ŭ vypadku padpisańnia Ukrainaj Pahadnieńnia ab asacyjacyi ź Jeŭrasajuzam budzie prymacca na ŭzroŭni ŭrada Rasii, a nie Jeŭrazijskaj ekanamičnaj kamisii. U pryvatnaści, adznačyŭ jon, razhladałasia pytańnie mahčymaha prymianieńnia Rasijaj dadatku 6 da damovy ab zonie svabodnaha handlu ŭ SND u suviazi z mahčymym padpisańniem Ukrainaj Pahadnieńnia ab asacyjacyi ź ES. Hety dadatak dazvalaje ŭžyvać unutry zony svabodnaha handlu nienulavyja staŭki mytaŭ da krain, jakija zaklučyli takija pahadnieńni ź inšymi krainami, kali heta pryviało da istotnaha rostu impartu praz skryžavańnie hetych zon svabodnaha handlu. Pry hetym hetyja nienulavyja staŭki nie mohuć być vyšejšyja za tyja, jakija pryniała na siabie kraina ŭ miežach ŭvachodžańnia ŭ SHA.
Jak raniej zajaviŭ ministr zamiežnych spraŭ Šviecyi Karł Bilt, ES «nie pakinie biez nastupstvaŭ» mahčymyja handlovyja miery RF suprać Ukrainy paśla padpisańnia pahadnieńnia ab asacyjacyi. «Padpisańnie [ekanamičnaha błoka] Pahadnieńnia ab asacyjacyi z Ukrainaj adbudziecca ŭ piatnicu 27 červienia, jak i było zapłanavana. Što tyčycca rasijskich pahroz prymianić handlovyja miery suprać hetaj krainy, to ES nie pakinie ich biez nastupstvaŭ», — papiaredziŭ Bilt.
