U našym staražytnym horadzie za Savietami i paźniej, u časy pierabudovy, ułady pastaralisia ŭźvieści pomniki i rasstralanym palakami ŭ 1920‑m hodzie partyzanam, i voinam‑aŭhancam, navat dva bronzavyja abeliski maršału Žukavu, jaki tut ŭ 30‑ia hady kamandavaŭ kavaleryjskaj dyvizijaj. U centry horadu pierad «Dažynkami‑2005» pastavili bronzavy, u poŭny rost, pomnik voinu‑vyzvalicielu. Jość pablizu i pomnik śviatoj Safii Słuckaj. Zusim niadaŭna byŭ adkryty memaryjał u pamiać viaźniaŭ habrejskaha hieta, jakija 8 lutaha 1943 hodu byli rasstralanyja i spalenyja fašystami. Rychtujecca navat pomnik słuckim tkačycham, što prasłavilisia ŭ znakamitym vieršy Maksima Bahdanoviča.
Voś tolki achviaram balšavickaha teroru 1920‑50‑ch pomnika ŭ horadzie niama. A ich, pakutnikaŭ, była nie adna tysiača, i amal usie jany prajšli praz Słuckuju akruhovuju turmu, kudy zvozili aryštavanych z čatyroch navakolnych rajonaŭ. Turmu razburyli ŭ 1970‑ia, na tym miescy ŭźviedzieny najbujniejšy ŭ horadzie univermah «Słucki». Tarcavy bok budynku mieścicca na byłym turemnym padvorku. U samy raz na jaho ścianie zamacavać memaryjalnuju šyldu u pamiać achviaraŭ, jakich vieźli adsiul na rasstreł — u les vakoł viosak Kučyna i Kalita, abo va ŭročyšča Haravacha la vioski Sielišča. Kab ludzi mahli pakłaści kvietki, pastajać u cichim rozdumie, a takija b znajšlisia ŭ horadzie i rajonie.
Mahčyma, taja doška stała b pačatkam uźviadzieńnia ŭ horadzie kapitalnaha pomnika achviaram tatalitaryzmu, u tym liku i tym, chto zahinuŭ u listapadzie—śniežni 1920 hodu ŭ Słuckim zbrojnym čynie pad Siemiežavam, Cimkavičami, Vyznaj, Hrozavam.
