U Biełarusi ŭ handli budzie ŭviedzieny abaviazkovy asartymientny pieralik, paviedamiŭ 23 lipienia na pres-kanfierencyi ŭ Minsku ministr handlu Valancin Čakanaŭ.
«Asartymientny pieralik źjaŭlajecca minimalnym, kab vy zmahli pryjści ŭ mahazin i, umoŭna, znajšli małako, chleb, kapustu, kaŭbasu, miasa i h. d. Jon zychodzić z taho, što vypuskajecca našymi vytvorcami, plus krytyčny impart, jaki pryvozicca ŭ Biełaruś (kava, cytrusavyja i inš.). Zahadčyk mahazina, kiraŭnik handlovaj sietki abaviazany mieć hetyja tavary ŭ mahazinie. Usio astatniaje, što pryvoziać u Biełaruś z-za miažy, nie zabaronienaje i jano moža być u luboj kolkaści u mahazinie», — skazaŭ ministr.
Zhodna ź jaho słovami, mierkavańnie i patrabavańnie Minhandlu — biełaruski tavar pavinien mieć pryjarytetnyja miescy. «Narmatyŭna-pravavoha akta pa abmiežavańni doli impartu ŭ handli nie isnuje. My padrychtavali adzin dakumient, jaki razhladajecca va ŭradzie. Tam skazali, što ŭ handli pavinna być nie mienš jak 72% ajčynnaha tavaru, kab nie padaŭ hety pracent. Ale hety dakumient jašče nie pryniaty», — skazaŭ Čakanaŭ.
Pavodle vynikaŭ pieršaha paŭhodździa 2014 hoda dola tavaraŭ ajčynnaj vytvorčaści ŭ roźničnym tavaraabarocie skłała 70,4%, što na 1,1% bolš, čym u pieršym kvartale. «Heta vyšej, čym u susiednich krainach. My sioleta i asabliva padčas čempijanatu śvietu pa chakiei ŭ Minsku pakazali, što možam pradavać nie tolki 70% ajčynnaha tavaru, ale i bolš. Ja dumaju, što hetuju liniju Minhandlu budzie pravodzić, i jana niaźmiennaja», — padkreśliŭ kiraŭnik ministerstva.
Čakanaŭ taksama paviedamiŭ, što pravodzicca praca pa impartazamiaščeńni. Za apošnija piać hadoŭ naładžanaja vytvorčaść 280 vidaŭ impartazamiaščalnych tavaraŭ. Sioleta Minhandlu prapanavaŭ 306 vidaŭ, ź ich 63 byli pryniatyja pramysłovaściu, a 59 užo znachodziacca na palica mahazinaŭ. «Vielmi važna aktyŭna pracavać z handlovymi sietkami, handlem pa prasoŭvańni ajčynnaha tavaru. Ja liču, što nieabchodna sietkavym kampanijam pačynać dyjałoh z našymi vytvorcami, z našaj pramysłovaściu. Usio, što vypuščanaje na terytoryi Biełarusi, usio, što vyjšła z zavodskich cechaŭ, pavinna być na palicach mahazinaŭ. Pakupnik niachaj sam vybiraje, što kuplać. Ale ja ŭpeŭnieny, što bolšaść tavaraŭ ajčynnaj vytvorčaści nie horšyja pa jakaści za impartnyja. U šerahu vypadkaŭ hety tavar tańniejšy, i nam treba jaho prasoŭvać. My časam zabyvajem, što hety tavar vypuskajuć našy svajaki, susiedzi. U nas jašče jość u mientalitecie, što impartnaje lepšaje. Heta daloka nie tak», — ličyć ministr.
