Pa vynikach apytańnia, praviedzienaha daśledčym centram «HeadHunter Biełaruś», prajekt «RABOTA.TUT.BY», pastajanna spaźniajecca na pracu kožny siomy biełarus (14%). U toj ža čas bolš za tracinu respandentaŭ zapeŭnivajuć, što zaŭsiody prychodziać svoječasova na svajo pracoŭnaje miesca.
U bolšaści kampanij pačatak i kaniec pracoŭnaha dnia dakładna zafiksavanyja, adnak bolš čym u tracinie vypadkaŭ ustanoŭleny paradak nosić farmalny charaktar. Rabotadaŭca nijak nie kantraluje čas prychodu i adychodu svaich supracoŭnikaŭ, spadziejučysia na ich sumleńnie i adkaznaść. 4% respandentaŭ adznačyli, što ŭ ich kampanijach spaźnieńnie navat na hadzinu ličycca normaj. U asnoŭnym ža spaźnieńnie dapuskajecca na 5-10 chvilin.
«Bolšaść kiraŭnikoŭ zacikaŭlenyja ŭ dakładnaj sistemie kantrolu. 19% kampanij viaduć žurnał, u jakim adznačajecca čas prychodu/adychodu kožnaha rabotnika, 28% — ustanaŭlivajuć elektronnuju sistemu kantrolu, kali kožny čałaviek adznačajecca płastykavaj kartkaj pry ŭvachodzie/vychadzie z budynka, jašče čverć kampanij uskładaje hetyja abaviazki na adnaho z supracoŭnikaŭ. U bolš redkich vypadkach rabotadaŭcy ŭstanaŭlivajuć kamiery videanazirańnia dla hetych metaŭ, vykarystoŭvajuć crm-sistemu, abo praviarajuć najaŭnaść supracoŭnikaŭ na miescach ranišnim zvankom abo paviedamleńniem u kamunikatary», — kamientuje Śviatłana Šaporava, dyrektar «HeadHunter Biełaruś» (prajekt «RABOTA.TUT.BY»).
Pavodle jaje słoŭ, najbolš raspaŭsiudžanaje pakarańnie za parušeńnie režymu pracoŭnaha času — papiaredžańnie, na druhim miescy — pazbaŭleńnie premii. Samaja žorstkaja miera dyscyplinarnaha spahnańnia — štraf. Štrafy prymianiajucca vielmi redka i tolki pry ŭmovie sistematyčnaha parušeńnia praviłaŭ.
«Supracoŭniki, jakija spaźniajucca, čaściej za ŭsio spasyłajucca na ciažkaść ustavać ranicaj i prablemy z transpartam. Tolki kožny piaty pryznajecca ŭ tym, što nie ŭmieje płanavać ułasny čas», — adznačyła ekśpiert.
