Kantaktnaja hrupa pa Ukrainie na pasiadžeńni ŭ Minsku vyrašyła, što pa maršrucie misii ABSIE da miesca krušeńnia małajzijskaha «Boinha» nie buduć vieścisia bajavyja dziejańni.
«U miežach rabočaj hrupy vyrašana, što ŭ tym kalidory, jaki siońnia byŭ pravierany misijaj ABSIE z partniorami ź Niderłandaŭ i Aŭstralii, budzie padtrymlivacca spynieńnie lubych bajavych dziejańniaŭ», — zajaviŭ na bryfinhu 31 lipienia vice-premjer Ukrainy, staršynia dziaržkamisii pa rasśledavańni pryčyn katastrofy Uładzimir Hrojsman, paviedamlaje RIA Novosti.
Nahadajem, u sustrečy ŭdzielničajuć eks-prezident Ukrainy Leanid Kučma, pasoł Rasii va Ukrainie Michaił Zurabaŭ i aficyjny pradstaŭnik dziejnaha staršyni ABSIE pa pytańniach urehulavańnia situacyi va Ukrainie Adelchiejd Taljavini. Pavodle infarmacyi dziaržaŭnaha ahienctva BiełTA, u pieramovach taksama ŭdzielničajuć pradstaŭniki kiraŭnictva samaabvieščanaj «Danieckaj narodnaj respubliki» (DNR).
Viečaram 29 lipienia pres-słužba Alaksandra Łukašenki raspaŭsiudziła infarmacyju ab telefonnaj razmovie z prezidentam Ukrainy Piatrom Parašenkam «pa inicyjatyvie ŭkrainskaha boku». «Prezident Ukrainy źviarnuŭsia da kiraŭnika biełaruskaj dziaržavy z prośbaj pryciahnuć Respubliku Biełaruś u jakaści placoŭki dla praviadzieńnia pieramoŭ z udziełam usich zacikaŭlenych bakoŭ pa vyrašeńni ŭkrainskaha kryzisu. Alaksandr Łukašenka zhadziŭsia z hetaj inicyjatyvaj», — paviedamiła pres-słužba.
Pavodle źviestak Administracyi prezidenta Ukrainy, Parašenka źviarnuŭsia da Łukašenki z prośbaj «sadziejničać praviadzieńniu ŭ Minsku 31 lipienia pasiadžeńnia trochbakovaj kantaktnaj hrupy pa ŭrehulavańni situacyi na Danbasie z udziełam druhoha prezidenta Ukrainy Leanida Kučmy, pasła Rasii Michaiła Zurabava i pradstaŭnika ABSIE». Jak paviedamiŭ Parašenka, na abmierkavańnie prapanoŭvałasia vynieści dva pytańni: vyzvaleńnie ŭsich załožnikaŭ, jakija zastajucca ŭ bajevikoŭ (168 čałaviek), i zabieśpiačeńnie dopusku mižnarodnych ekśpiertaŭ na miesca padzieńnia samalota «Małajzijskich avijalinij».
Ciapier čytajuć
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier77
Kamientary