Palityčnyja pieraploty mała što značać dla sialanaŭ. U pieršy hod paśla Majdanu Ukrainy źbiraje rekordny ŭradžaj pšanicy, pry ŭradžajnaści da 40 centnieraŭ z hiektara. Rekord i ŭ Biełarusi: taksama amal 40 centnieraŭ ziernia z hiektara, a na haspadarlivaj Hrodzienščynie — usie 48. Hod byŭ idealny dla žyta i pšanicy. Chałodnaja viasna, daždžysty červień. A na žnivo — idealnaja śpioka. Voś i vyras vydatny chleb.
«Sioleta ŭ nas litaralna šalonyja tempy zboru ŭradžaju, — raskazaŭ dyrektar Ukrainskaha hidramietcentra Mikałaj Kulbida. — Hetamu spryjajuć ŭmovy nadvorja», - skazaŭ jon na bryfinhu ŭ paniadziełak u Kijevie.
Kulbida adznačyŭ, što va Ukrainie vielmi vysoki ŭradžaj samaj kaštoŭnaj, azimaj pšanicy. Jon, pa ŭsioj bačnaści, budzie najvyšejšym za ŭsiu historyju niezaležnaj Ukrainy, saviecki pieryjad i pieryjad da hetaha.
Taki samy rekordny ŭradžaj źbiaruć i ŭ Biełarusi.
A voś uradžaj kukuruzy i bulby moža akazacca słabym, kali śpioka zaciahniecca. Pad pahrozaj akazalisia i pasievy cukrovych burakoŭ, harodniny.
Baluča bačyć žoŭtyja praplešyny na vysokich miescach. Prapadajuć ludskaja praca i hrošy.
Va Ukrainie jość prablemy i z dyzpalivam. Ułasnaj vytvorčaści ŭkraincam zamała.
4 žniŭnia adbyłasia telefonnaja razmova Alaksandra Łukašenki z prezidentam Ukrainy Piatrom Parašenkam.
Kiraŭniki dziaržaŭ abmierkavali handlovyja adnosiny pamiž krainami.
Asablivuju ŭvahu prezidenty ŭdzialili temie pastavak naftapraduktaŭ ź Biełarusi va Ukrainu.
Alaksandr Łukašenka padkreśliŭ, što Biełaruś razumieje vastryniu hetaha pytańnia z ulikam uboračnaj kampanii i tamu, niahledziačy na ŭnutranyja patrebnaści, akaža sadziejničańnie Ukrainie ŭ zabieśpiačeńni jaje ekanomiki naftapraduktami.
